ევროპარლამენტის წევრი მიხაელ ფონ დერ შულენბურგი: გარედან სახელმწიფო ხელისუფლების ცვლილება არასოდეს ამართლებს, გარედან დასმული ხელისუფალი როგორც წესი არის უფრო კორუმპირებული და ვერასოდეს ინარჩუნებს მოსახლეობის მხარდაჭერას
პოლიტიკა

იან პრაუდი მიხაელ ფონ დერ შულენბურგი
ფოტო: IMEDI/ვიდეოკადრი
სახეზეა საერთაშორისო სამართლის რღვევა, დიპლომატიას კი საერთაშორისო სამართალი ესაჭიროება, რადგან საჭიროა საერთო ღირებულებები რომელთა მიხედვითაც ვიმოქმედებთ, - განაცხადა გადაცემაში „თბილისის დროით“ ევროპარლამენტის წევრმა, დიპლომატმა მიხაელ ფონ დერ შულენბურგმა გერმანიის ელჩზე საუბრისას.
მისივე თქმით, გაეროს ქარტია მკაფიოა სხვა სახელმწიფოთა შიდა საქმეებში ჩაურევლობის თაობაზე - თანაბარი სუვერენიტეტი, თვითგამორკვევის პრინციპი და ა.შ.
„ეს პრინციპები განსაკუთრებით მნიშვნელოვანია, როდესაც საქმე ეხება შედარებით მცირე ზომის სახელმწიფოებს. ელჩები კი ამ მოცემულობას უნდა ემორჩილებოდნენ. არ შეიძლება, რომ ისინი სახელმწიფოს შიდა საქმეებში ერეოდნენ, შესაძლოა მათ ჰქონდეთ რეკომენდაციები, მაგრამ არა სახელმწიფოში პოლიტიკური მოვლენების ზეგავლენის მიზნით. მიუხედავად ამისა, საპირისპიროს მოწმენი ვართ მუდამ და ეს არასოდეს არის დადებითი შედეგების მომტანი.
არცერთ სახელმწიფოში, რომელშიც ნამყოფი ვარ, სადაც გარედან ჩარევით ხელისუფლების ცვლილება მომხდარა, არ ყოფილა ეს წარმატებული. ეს ყოველთვის სრულდება ქაოსით, ანარქიით და უბედურებით. გარედან სახელმწიფო ხელისუფლების ცვლილება არასოდეს ამართლებს, გარედან დასმული ხელისუფალი როგორც წესი არის უფრო კორუმპირებული და ვერასოდეს ინარჩუნებს მოსახლეობის მხარდაჭერას. ასე რომ გარედან მთავრობის შეცვლის მოცემულობას ძალიან ფრთხილად უნდა მოვეკიდოთ.
ნებისმიერი ცვლილება ქვეყანაში შიგნიდან მომავალი პროცესის ბუნებრივი შედეგი უნდა იყოს. დიპლომატია ყოველთვის მოიცავდა მეორე მხარისადმი პატივისცემას, ასევე მტრისას მათ შორის. დიპლომატია გულისხმობს მეორე მხარის მოსმენას, შესაძლოა არ ეთანხმებოდე, მაგრამ დიალოგი აუცილებელია. აუცილებელია შეეცადო გაუგო მეორე მხარეს. დღეს კი დიპლომატიაში ეს ღირებულებები უგზო-უკვლოდ არის დაკარგული“, - განაცხადა მიხაელ ფონ დერ შულენბურგმა.





