დავით მათიკაშვილი გიორგი გახარიას „ჰერტის სკოლის“ სტიპენდიატობაზე: ეს არის ერთი - ერთში ჩამჯდარი მაგალითი სალომე ზურაბიშვილთან მიმართებით რაც იყო. ვხედავთ, რომ ამ ეტაპისთვის ეს ორი გამორჩეული აგენტი კიდევ საჭიროა მათი პატრონებისთვის

ეს არის ერთი - ერთში ჩამჯდარი მაგალითი სალომე ზურაბიშვილთან მიმართებით რაც იყო, - განაცხადა საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა გიორგი გახარიას „ჰერტის სკოლის“ სტიპენდიატობასთან დაკავშირებით.

მისი თქმით, როგორც ჩანს გარე პატრონებს გიორგი გახარიაც ისევე სჭირდებათ, როგორც სალომე ზურაბიშვილი.

„პატრონები თავის აგენტებს, როგორც ეტყობა ამ ეტაპზე არ ტოვებენ. ცდილობენ, რომ აგენტურის რესურსი ბოლომდე გამოიყენონ. შემდეგ, როგორც ეს სჩვევიათ აგენტთან მიმართებით, მას ისე მიაგდებენ, რომ არანაირ ყურადღებას არ მიაქცევენ. ამ ეტაპზე ჯერ ეს პერიოდი არ დაუდგა გახარიას. ეს არის მსგავსი, ერთი - ერთში ჩამჯდარი მაგალითი სალომე ზურაბიშვილთან მიმართებით რაც იყო. ვხედავთ, რომ ამ ეტაპისთვის ეს ორი გამორჩეული აგენტი კიდევ საჭიროა მათი პატრონებისთვის ანტიქართული, ჩვენი ქვეყნისთვის ანტიეროვნული საქმიანობის საწარმოებლად“, - განაცხადა დავით მათიკაშვილმა.

სალომე ზურაბიშვილის შემდეგ უცხოელმა პატრონებმა ამჯერად ორ მძიმე სისხლის სამართლის საქმეში ბრალდებული და ქვეყნიდან გაქცეული გახარია დაასაქმეს.

გახარია ზურაბიშვილის მსგავსად სტიპენდიატი გახდა, ოღონდ „ჰერტის სკოლის“. სკოლის ვებ-გვერდზე გახარიას შესახებ ინფორმაცია უკვე ატვირთულია. ყოფილი პრემიერის ბიოგრაფიაში წერია, რომ ის არის გამოჩენილი ქართველი პოლიტიკოსი, რომელსაც საქართველოში წარმატებული პოლიტიკური კარიერა ჰქონდა.