მამუკა მდინარაძე კონგრესმენების ვიზიტზე: Google-შიც კი იძებნება ეს ადამიანი, როგორც ერთ-ერთი ყველაზე კორუმპირებული კონგრესმენი. ასეთი ადამიანები ჩამოდიან და ძალიან კრიტიკულად აფასებენ „ქართულ ოცნებას“

გულწრფელად გითხრათ, ამ კონგრესმენის შესახებ ბევრი არაფერი ვიცოდი და როდესაც ჩვენს მიმართ ძალიან კრიტიკული განცხადებები გააკეთა, დავგუგლე და Google-ში ამოვარდა უამრავი ძალიან ცუდი ინფორმაცია. მათ შორის, Google-ში ის მოხსენიებული იყო, როგორც ერთ-ერთ ყველაზე კორუმპირებული კონგრესმენი, - ამის შესახებ საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ, საქართველოში სენატორ ჯინ შაჰინის და კონგრესმენ მაიკ ტერნერის ვიზიტთან დაკავშირებით დასმული შეკითხვის პასუხად განაცხადა.

მისი თქმით, ჩამოსული სტუმრების შესახებ მას შემდეგ დაინტერესდა, რაც მათგან „ქართული ოცნების“ ხელისუფლების თაობაზე კრიტიკული განცხადებები მოისმინა.

„Google-შიც კი იძებნება ეს ადამიანი, როგორც ერთ-ერთი ყველაზე კორუმპირებული კონგრესმენი, რაც ძალიან სამწუხაროა. და ისიც სამწუხაროა, რომ ასეთი ადამიანები ჩამოდიან და ძალიან კრიტიკულად აფასებენ „ქართულ ოცნებას“, მაშინ, როდესაც იგივე ადამიანები და არა მხოლოდ ისინი, სხვა ქვეყნებს, რომელთაც დემოკრატიული მიღწევები მაინც და მაინც არ აქვთ, ოაზისად იხსენიებენ ხოლმე. ამას თავისი კონკრეტული მიზეზები აქვს და ქართული საზოგადოება ამაში უკვე კარგად გაერკვა“, - აღნიშნა მამუკა მდინარაძემ.