შალვა პაპუაშვილი: ხვდებიან, რომ პერსპექტივა აღარ აქვს სტატუსის მინიჭების ჩაშლისკენ მიმართულ მცდელობებს და ახლა ყველა ცდილობს, რაიმენაირად ქართველი ხალხის გამარჯვების მონაწილე გახდეს

მცდელობებს, რომლებიც კანდიდატის სტატუსის მინიჭების ჩაშლისკენ იყო მიმართული, ხვდებიან, რომ პერსპექტივა აღარ აქვს. პოზიტიური სიგნალები მოდის და ახლა ყველა ცდილობს, რაიმენაირად ქართველი ხალხის გამარჯვების მონაწილე გახდეს, – ასე გამოეხმაურა საქართველოს პარლამენტის თავმჯდომარე შალვა პაპუაშვილი არასამთავრობო ორგანიზაციების ევროკომისიისადმი მიმართვას, რომ არსებული პრობლემების მიუხედავად, საქართველოსთვის კანდიდატის სტატუსის მინიჭების რეკომენდაცია გასცეს.

„როგორც ვხედავ, ზოგიერთი არასამთავრობო ორგანიზაცია არ იყო მონაწილე ამ ხელმოწერებისა. ფაქტია, რამდენიმე ელიტური „ენჯეოს“ მიერ ორგანიზებული განცხადებაა და თავად ამ განცხადების ტონალობაშიც კიდევ ერთხელ იკვეთება, რამდენად არასწორად იქცევიან ეს ორგანიზაციები. მცდელობებს, რომლებიც კანდიდატის სტატუსის მინიჭების ჩაშლისკენ იყო მიმართული, ხვდებიან, რომ ამას პერსპექტივა აღარ აქვს, პოზიტიური სიგნალები მოდის და ახლა ყველა ცდილობს, რამენაირად ქართველი ხალხის გამარჯვების მონაწილე გახდეს.

წლინახევრიანი საბოტაჟისა და წინააღმდეგობის მიუხედავად, როგორც ჩანს, ევროკავშირი პოზიტიური გადაწყვეტილებისთვის ემზადება. ამით ქართველი ხალხი გაიმარჯვებს და დამარცხდება ყველა ჯგუფი, პოლიტიკური იქნება, თუ არასამთავრობო ორგანიზაციებიდან ზოგიერთი ელიტური „ენჯეო“, რომელიც ამას ეწინააღმდეგება.

შეგახსენებთ, მათ შორის იმ ელიტურ „ენჯეოებში“, რომელიც იყვნენ მონაწილეები ამ განცხადების ხელმოწერისა, არიან ზუსტად ის ორგანიზაციები, რომლებიც ზეწოლას ახდენდნენ საქართველოს პარლამენტის წევრებზე, სახალხო დამცველის კანდიდატისთვის მხარი არ დაეჭირათ და ამით შლიდნენ პროცესს, ზეწოლას ახდენდნენ, იუსტიციის უმაღლესი საბჭოს არამოსამართლე წევრების კანდიდატურისთვის მხარი არ დაეჭირათ. ამ ზეწოლის მიუხედავად, საქართველოს პარლამენტმა შეძლო როგორც სახალხო დამცველის, ისე იუსტიციის უმაღლესი საბჭოს არამოსამართლე წევრების არჩევა. მათი მხრიდან ეს განცხადებები ახლა უკვე დაგვიანებულია. გარდა ამისა, ვნახე, რომ ამ ხელმომწერებში, ინიციატორებში არიან ისინიც, რომლებიც ჩართული არიან საქართველოში ექსტრემიზმის წახალისებაში. ჩვენ ახლახან გავიგეთ ინფორმაცია, რომ არსებობს ფონდი უცხოური ფულით, რომელიც ჯარიმებს უხდის კანონდამრღვევებს და სწორედ ამ ფონდის ინდულგენციის ბორდის წევრები არიან, მათ შორის ამ განცხადების ინიციატორები. ვიცით, რომ ეს პროექტი რასაც ემსახურება, არის სწორედ წახალისება ექსტრემიზმის, იმით, რომ კარტ ბლანშს აძლევენ მომავალი დარღვევებისთვის“, - განაცხადა პაპუაშვილმა.