www.imedi.ge
„ქართულმა ოცნებამ“ ქარელში მომხდარ ინციდენტთან დაკავშირებით ვიდეომასალა გაავრცელა
პოლიტიკა

ფოტო: IMEDI
„ქართულმა ოცნებამ“ ქარელში მომხდარი ინციდენტის შემდეგ გადაღებული ვიდეომასალა გაავრცელა. პარტიის ოფისში გამართულ ბრიფინგზე კადრები მამუკა მდინარაძემ წარადგინა. მისი თქმით, კადრებში ჩანს, რომ ინციდენტის შემდეგ ოპერატორი უგონოდ არ იმყოფება.
მან ასევე განმარტა, რომ ვიდეომასალა ქარელში „ქართული ოცნების“ ოფისის წინ დამონტაჟებულმა კამერამ გადაიღო.
„შეგვიძლია ვთქვათ, რომ ნიკა გვარამიას და მისი ტელევიზიის მოწყობილი გუშინდელი შოუ შეიცავდა როგორც დეზინფორმაციას, ასევე ზიზღის ენასა და მანიპულაციას. როგორც იტყვიან ხოლმე, იყო სრული „ბუკეტი“ იმისა, რაზეც ჩვენ ორი დღის წინ ვისაუბრეთ და რისი ლუსტრირებაც მოვახდინეთ. გუშინ წამოცდა გვარამიას ერთ-ერთ ჩართვაში, რომ ოპერატორი კი არ გადმოაგდეს, გადმოვარდა, თუმცა ასეთი წამოცდენა შეიძლება ისედაც იყოს, ამაზე აღარ გავჩერდები.
ჩვენი შტაბის წინ ქარელში არის კამერა, რომელმაც გადაიღო გარკვეული ეპიზოდი. გვარამიამ გუშინ რამდენჯერმე გაიმეორა, რომ ოპერატორი გადმოვარდნის შემდეგ იყო უგონო მდგომარეობაში. ასევე ის ამბობდა, რომ როდესაც სასწრაფოში რეკავდა ბექა ყორშია, ოპერატორი მაშინაც უგონოდ იყო. კადრში ხედავთ ოპერატორს, რომელიც გადაადგილდება კამერასთან ერთად, შემდეგ ჯდება და არანაირ უგონო მდგომარეობასთან არ გვაქვს საქმე. ეს არის კიდევ ერთი ტყუილი იმისთვის, რომ მოხდეს მანიპულაცია“, - განაცხადა მდინარაძემ.
მდინარაძემ „მთავარ არხს“ კიდევ ერთხელ მოუწოდა გაავრცელოს ინციდენტის ამსახველი მასალა, რომელიც ლევან აბლოთიამ გადაიღო და „ქართული ოცნების“ მხარდამჭერებს მოთმინებასა და თავშეკავებისკენ მოუწოდა, რომ პროვოკაციებზე არ წამოეგონ.
„მთავარმა არხმა“ გაავრცელა ინფორმაცია, რომ მათი ოპერატორი ლევან აბლოთია „ქართული ოცნების“ ქარელის შტაბის წარმომადგენლებმა მეორე სართულიდან გადააგდეს, რასაც მმართველ პარტიაში გამოეხმაურნენ და განაცხადეს, რომ ეს ფაქტი სიმართლეს არ შეესაბამება. ლევან აბლოთიას ჯანმრთელობის მდგომარეობა სტაბილურია, ის საავადმყოფოდან უკვე გაწერეს.





