სამადაშვილი: დღეს იწყება საერთო ეროვნული მოძრაობა ივანიშვილის დიქტატურისგან ქვეყნის გასათავისუფლებლად

დღეს იწყება საერთო ეროვნული მოძრაობა ივანიშვილის დიქტატურისგან ქვეყნის გასათავისუფლებლად,- ამის შესახებ „ნაციონალური მოძრაობის“ წევრმა სალომე სამადაშვილმა განაცხადა.

მისი თქმით, სხვადასხვა პოლიტიკურ პარტიასთან და საზოგადოებასთან ფართო კონსულტაციებს გამართავენ, რათა მმართველი გუნდის მიერ მომზადებული პროპორციული სისტემის პროექტის დღევანდელ კენჭისყრაზე ჩავარდნა გააპროტესტონ.

დეპუტატმა აღნიშნა, რომ „ნაციონალური მოძრაობა“ სამოქმედო გეგმასთან დაკავშირებით, სავარაუდოდ, დღესვე პოლიტიკური საბჭოს სხდომას გამართავს.

„ვფიქრობ, რომ, პირველ რიგში, გავმართავთ ძალიან ფართო კონსულტაციებს, როგორც სხვა პარტიებთან, ისე საზოგადოების წარმომადგენლებთან. ასევე, შედგება პოლიტსაბჭოს სხდომა, სავარაუდოდ, დღესვე. ვფიქრობ, რომ გადავალთ საგანგებო რეჟიმში. მშვიდობიანი საზოგადოებრივი პროტესტისა და დაუმორჩილებლობის კამპანია უნდა დავიწყოთ, რადგან რეალობა ძალიან ნათელია – ივანიშვილმა მოიხსნა უკვე ყველანაირი ნიღაბი და პირდაპირ გადადის ძალადობაზე ქართველი ხალხის წინააღმდეგ. ივანიშვილს არ უშველის საკონსტიტუციო ცვლილების ჩაგდება, რადგან რა სისტემითაც არ უნდა ჩატარდეს შემდეგი არჩევნები, მას არანაირი შანსი აღარა აქვს ქვეყანაში ძალაუფლების შენარჩუნების. უბრალოდ, დღეს მან გაამწვავა პროცესები, როდესაც დადგა სპექტაკლი, რომელსაც ვუყურეთ საქართველოს პარლამენტში, თითქოს ივანიშვილის პირადი ყურის ექიმი აღმოჩნდა სპარტაკის როლში აჯანყებულების ლიდერად. ჩავარდა საკონსტიტუციო ცვლილება, რომლის დაპირებაც გასცა ივანიშვილმა. დღეს იწყება საერთო ეროვნული მოძრაობა ივანიშვილის დიქტატურისგან ქვეყნის გასათავისუფლებლად. ამიტომ, ჩვენ გვიხილავთ ყველასთან ერთად, ვისაც სურს თავისუფალ, დემოკრატიულ ქვეყანაში ცხოვრება“, - განაცხადა სამადაშვილმა.

პარლამენტთან ამ წუთებში საპროტესტო აქცია მიმდინარეობს.

"პატრიოტთა ალიანსის" ლიდერი, ირმა ინაშვილი პარტიების, მათ შორის "ნაციონალური მოძრაობის", მხარდამჭერებს მობილიზაციისკენ მოუწოდებს, რათა პროპორციულ საარჩევნო სისტემაზე გადასვლის შესახებ პროექტის ჩაგდება გააპროტესტონ. ირმა ინაშვილის თქმით, "ახლა აღარ არის გარჩევის დრო, ესა და ის პარტია, ყველამ უნდა გააერთიანოს ძალები".

პარლამენტში პროპორციულის ჩაგდებასთან დაკავშირებით Facebook-ლაივის დროს მიხეილ სააკაშვილმაც ილაპარაკა და თქვა, რომ "23 ნოემბერი მოდის და ხალხი უნდა დაირაზმოს".

პარლამენტმა 2020 წლის საპარლამენტო არჩევნების პროპორციული წესით, ნულოვანი ბარიერის პირობებში, ჩატარებასთან დაკავშირებით მომზადებულ საკონსტიტუციო ცვლილებებს მხარი არ დაუჭირა. 101 დეპუტატი მომხრე, 3 კი წინააღმდეგი იყო. უკვე ცნობილია, ვინ დაუჭირა და არ დაუჭირა მხარი პროპორციულ საარჩევნო სისტემაზე გადასვლას.