POLITICO: რუსეთის ორმა რაკეტამ მოლდოვის საჰაერო სივრცე დაარღვია
მსოფლიო
ფოტო: Getty Images
მოლდოვის თავდაცვის სამინისტროს განცხადებით, ოთხშაბათს დილით რუსეთის ორმა რაკეტამ ქვეყნის საჰაერო სივრცე დაარღვია. ინფორმაციას POLITICO ავრცელებს.
კიშინიოვის ინფორმაციით, ორივე რაკეტა მოლდოვის საჰაერო სივრცეში რამდენიმე წუთის განმავლობაში იმყოფებოდა. უწყების განცხადებით, პირველმა რაკეტამ სახელმწიფო საზღვარი უკრაინის ოდესის ოლქის მხრიდან, ადგილობრივი დროით 06:04 საათზე გადმოკვეთა, ხოლო მოლდოვის საჰაერო სივრცე 06:09 საათზე დატოვა.
მეორე რაკეტა ქვეყნის საჰაერო სივრცეში ორი წუთის შემდეგ შევიდა და მოლდოვის ცაში რამდენიმე წუთის განმავლობაში დარჩა. ორივე რაკეტამ საჰაერო სივრცის დარღვევის შემდეგ უკრაინის ტერიტორიაზე გადაინაცვლა.
„საჰაერო ოპერაციების ცენტრი, კომპეტენტურ უწყებებსა და პარტნიორებთან კოორდინაციით, საჰაერო სივრცის მონიტორინგს განაგრძობს“, - ნათქვამია თავდაცვის სამინისტროს განცხადებაში.
როგორც POLITICO წერს, ინციდენტი აღმოსავლეთ ევროპის ქვეყნებში დრონების გახშირებული შეჭრის ფონზე მოხდა. აგვისტოში რუმინულმა F-16 ტიპის გამანადგურებელმა დრონი ჩამოაგდო, ოქტომბერში კი შავ ზღვაში, ბულგარეთის ტერიტორიულ წყლებში, დრონის თავდასხმის შედეგად გემი ჩაიძირა. მანამდე რეგიონში გემებზე დრონებით რამდენიმე თავდასხმაც მოხდა.
ოქტომბრის ბოლოს მოლდოვის სოფელ კიშტელნიცაში რუსული დრონი საცხოვრებელი შენობიდან დაახლოებით 100 მეტრის მოშორებით ჩამოვარდა.
