პარიზში აქცია პოლიციამ ცრემლმდენი გაზის გამოყენებით დაშალა. „ქრონიკა“ საფრანგეთიდან

პარიზში აქცია პოლიციამ ცრემლმდენი გაზის გამოყენებით დაშალა. უსაფრთხოების ზომების უპრეცედენტოდ გამკაცრების მიზეზი, მასშტაბური პროტესტის ახალი ტალღის დაანონსებაა.

მანამდე სამართალდამცველებმა აქციის მონაწილეები გაჩხრიკეს.

გუშინვე საფრანგეთის პოლიციამ გაავრცელა ვიდეომასალა, სადაც ჩანს, რომ პოლიციის ოფიცერს ე.წ. მოლოტოვის კოქტეილი ესროლეს, რის შემდეგაც მას ცეცხლი წაეკიდა.

პარიზში იმყოფება „ქრონიკის“ გადამღები ჯგუფი. როგორც აქციის მონაწილეებმა „ქრონიკასთან“ განაცხადეს, მთავრობა ქვეყანაში არსებულ პრობლემებს ვეღარ უმკლავდება და პროტესტი იქამდე გაგრძელდება, სანამ ყველა პრობლემა არ მოგვარდება.

„სკოლებში პრობლემები ნამდვილად არსებობს. ფაქტობრივად ღარიბები ვართ, სახლში ფანჯარა ჩამტვრეული მაქვს, ამიტომ ძალიან ცივა. უამრავი ასეთი პრობლემაა. ყველაფერი ისეთი ძვირია, რთულია საფრანგეთში ცხოვრება, ქუჩაში მომავალშიც გავალ და ყველა ასე მოვიქცევით. ეს აქცია მხოლოდ მცირე პროტესტია“, - განაცხადა აქციის ერთ-ერთმა მონაწილემ „ქრონიკასთან“.