„პატრიოტები ევროპისთვის“ პოლონეთის საკონსტიტუციო სასამართლოს გარშემო განვითარებულ მოვლენებზე: ამას ჩვენ მნიშვნელოვანი სახელმწიფო ინსტიტუტის ძალის გამოყენებით ხელში ჩაგდების მცდელობად მივიჩნევთ

ევროპარლამენტის სიდიდით მესამე პოლიტიკურმა ჯგუფმა, „პატრიოტები ევროპისთვის“ პოლონეთის საკონსტიტუციო სასამართლოს ირგვლივ განვითარებულ მოვლენებთან დაკავშირებით სპეციალური განცხადება გაავრცელა.

განცხადებაში პოლონეთის პრემიერ-მინისტრის დონალდ ტუსკისა და მისი მთავრობის მოქმედება მწვავედ არის გაკრიტიკებული, ხოლო ხელისუფლება მნიშვნელოვანი სახელმწიფო ინსტიტუტის ძალის გამოყენებით ხელში ჩაგდებაში არის დადანაშაულებული.

„შეშფოთებული და აღშფოთებული ვართ დონალდ ტუსკის მთავრობის მორიგი უკანონო და ანტიდემოკრატიული ქმედებით.

ამჯერად პოლიცია საკონსტიტუციო სასამართლოში ყოველგვარი სამართლებრივი საფუძვლის გარეშე შევიდა. ამას ჩვენ მნიშვნელოვანი სახელმწიფო ინსტიტუტის ძალის გამოყენებით ხელში ჩაგდების მცდელობად მივიჩნევთ“, - აღნიშნულია განცხადებაში.

წერილში დეპუტატები აგრეთვე აღნიშნავენ, რომ დონალდ ტუსკისთვის დემოკრატიული ღირებულებები მხოლოდ ფასადია, რომლის მიღმაც ძალაუფლებისკენ სწრაფვა, სუვერენული ეროვნული მთავრობების მიმართ უპატივცემულობა და კანონის უზენაესობის უგულებელყოფა იმალება.

„დონალდ ტუსკისთვის დემოკრატიული ღირებულებები მხოლოდ ფასადია, რომლის მიღმაც ძალაუფლებისკენ სწრაფვა, სუვერენული ეროვნული მთავრობების მიმართ უპატივცემულობა და კანონის უზენაესობის უგულებელყოფა იმალება.

დონალდ ტუსკს ევროკავშირის ისტებლიშმენტის კიდევ ერთ წარმომადგენლად მივიჩნევთ, რომელსაც საკუთარი ძალაუფლების ძალით თავს მოხვევა სურს. ასეთი მიდგომა ევროპული ხელისუფლებისთვის დამახასიათებელია და ჩვენ მას ყოველთვის მკაცრად ვეწინააღმდეგებით“, - ნათქვამია განცხადებაში.

ცნობისთვის, პოლონეთში საკონსტიტუციო სასამართლოს გარშემო კრიზისი მას შემდეგ დაიწყო, რაც 30 ოქტომბერს, გვიან ღამით სასამართლოს საიტზე გამოქვეყნდა ინფორმაცია, რომლის თანახმადაც, მოსამართლემ ანა კორვინ-პიოტროვსკამ ერთი თვით უფლებამოსილება შეუჩერა სასამართლოს მოქმედ თავმჯდომარეს ბოგდან სვენჩკოვსკის და მის მოადგილეს, ბართლომე სოხანსკის. ამ გადაწყვეტილებამ ხალხში უკმაყოფილება გამოიწვია. ადამიანებმა სასამართლოს შენობასთან აქცია გამართეს, რომელიც დაკავებებით დასრულდა.