იტალიის პრემიერმა „სამარცხვინო“ უწოდა მილანელი მოსამართლის გადაწყვეტილებას, გაეთავისუფლებინა აქტივისტი, რომელსაც 24 ოქტომბრის საპროტესტო აქციებზე არეულობის წაქეზებაში ადანაშაულებდნენ

იტალიის პრემიერ-მინისტრმა, ჯორჯია მელონიმ „სამარცხვინო“ უწოდა მილანელი მოსამართლის გადაწყვეტილებას, გაეთავისუფლებინა აქტივისტი, რომელსაც 24 ოქტომბრის საპროტესტო აქციებზე არეულობის წაქეზებაში ადანაშაულებდნენ.

მილანის სასამართლომ გაათავისუფლა უნივერსიტეტის მკვლევარი იუსეფ სიხერი, რომელსაც ბრალად ედება Telegram-არხის „მოძრაობა 17 ოქტომბრის“ ადმინისტრატორობა. სავარაუდოდ, ეს არხი იტალიაში პროტესტების ორგანიზებას უწყობდა ხელს.

მილანის პროკურატურამ იუსეფ სიხერი 24 ოქტომბერს დააკავა ისეთი დანაშაულის ჩადენის წაქეზების ბრალდებით, რომელსაც, სავარაუდოდ, ტერორისტული მოტივები ამძიმებს.

მილანელმა მოსამართლემ ტიციანა ლანდონიმ განაცხადა, რომ გამოძიებას, როგორც ჩანს, სერიოზული ხარვეზები აქვს.

„არ არსებობს სერიოზული საფუძველი იმის დასაჯერებლად, რომ [სიხერმა] ჩაიდინა ის დანაშაულები, რაშიც ადანაშაულებენ, აგრეთვე არ არსებობს მიმალვის რისკი“, - აღნიშნა ლანდონიმ თავის გადაწყვეტილებაში.

იტალიის პრემიერ-მინისტრმა მკაცრად დაგმო ეს გადაწყვეტილება.

„ვფიქრობ, ეს არის სამართალდამცავი ორგანოების, გამომძიებლების, შინაგან საქმეთა სამინისტროსა და, ზოგადად, ყველა იმ ადამიანის ძალისხმევის აუტანელი დამცირება, ვინც ცდილობს, დაიცვას წესიერი მოქალაქეები იმ რისკისგან, რომ მათი ქალაქები და კომერციული ობიექტები განადგურდეს“, - განაცხადა მელონიმ.

„მართლაც არ ვიცი, როგორ შეუძლია ნორმალურ სახელმწიფოს დაიცვას წესიერი ხალხი გარკვეული სასამართლო ორგანოების მსგავსი გადაწყვეტილებების პირობებში“, - დასძინა მთავრობის მეთაურმა.