POLITICO: ევროპის პროკურატურას კვლავ აქვს კითხვები ფონ დერ ლაიენთან „ფაიზერგეითის“ საქმეზე

ევროპის პროკურატურას ევროკომისიის პრეზიდენტ ურსულა ფონ დერ ლაიენთან კორონავირუსის ვაქცინების შესყიდვის საქმეზე კითხვები კვლავ აქვს. ინფორმაციას POLITICO ავრცელებს.

გამოცემის ცნობით, ფონ დერ ლაიენს ამ დრომდე პირადად არ მიუცია ჩვენება ევროპის პროკურატურისთვის, რომელიც ე.წ. „ფაიზერგეითის“ საქმეს იძიებს.

როგორც POLITICO წერს, გამოძიება უკავშირდება ევროკომისიის პრეზიდენტსა და ფარმაცევტული კომპანია Pfizer-ის აღმასრულებელ დირექტორ ალბერტ ბურლას შორის ვაქცინების შესყიდვის შესახებ წარმოებულ მოლაპარაკებებს. 2024 წელს ევროპის პროკურატურამ საქმე ბელგიელი გამომძიებლებისგან გადაიბარა. გამოცემის მიერ ნანახი სამართლებრივი დოკუმენტების თანახმად, გამოძიება შესაძლო დანაშაულებს, მათ შორის სამსახურებრივი უფლებამოსილების განხორციელებაში ჩარევას, SMS-შეტყობინებების განადგურებას, კორუფციასა და ინტერესთა კონფლიქტს ეხება.

ევროკომისიის სპიკერმა თომას რენიემ ფონ დერ ლაიენის მიერ ჩვენების არმიცემის შესახებ კითხვაზე პასუხად განაცხადა, რომ კომისია ევროპის პროკურატურასთან ფაქტებისა და გარემოებების დასადგენად აქტიურად თანამშრომლობს. მისი თქმით, ეს თანამშრომლობა ყოველთვის ხორციელდებოდა ევროკომისიის პრეზიდენტის სახელითა და სრული მხარდაჭერით. რენიეს განცხადებით, ფონ დერ ლაიენი ყოველთვის მზად იყო და კვლავაც მზად არის უპასუხოს გამოძიების ღია კითხვებს, საკუთარი მოვალეობებისა და დროის შესაძლებლობების ფარგლებში.

ევროპის პროკურატურის ხელმძღვანელმა ლაურა კოდრუცა კოვეშიმ, რომელიც თანამდებობაზე ყოფნის შვიდწლიან ვადას პარასკევს ასრულებს, POLITICO-თან ინტერვიუში განაცხადა, რომ არაერთხელ შეხვედრია ევროკავშირის მაღალჩინოსნებს, რომლებიც მისი უწყების მიერ გაგზავნილ დაბარებებს არ პასუხობდნენ.

„ზოგიერთ პოლიტიკოსს ჰგონია, რომ კანონის ზემოთ დგას. თუ ჩვენ ჩვენების მისაცემად გიბარებთ, უნდა გამოცხადდეთ“, - განაცხადა კოვეშიმ.

მისი თქმით, გამოძიების ფარგლებში სირთულეები განსაკუთრებით მაშინ იჩენს თავს, როდესაც საქმე გავლენიან პოლიტიკოსებს ან პოლიტიკურ წრეებთან დაკავშირებულ მდიდარ ადამიანებს ეხება.