Euronews: ჩრდილოეთ ევროპის ქვეყნებს შორის იშვიათი პოლიტიკური ბზარი გაჩნდა - დანიისა და შვედეთის პრემიერ-მინისტრებმა საჯაროდ გააკრიტიკეს ფინეთისა და ნორვეგიის ლიდერები ვლადიმირ პუტინთან გამართული მოულოდნელი სატელეფონო საუბრის გამო

ჩრდილოეთ ევროპის ქვეყნებს შორის იშვიათი პოლიტიკური ბზარი გაჩნდა - დანიისა და შვედეთის პრემიერ-მინისტრებმა საჯაროდ გააკრიტიკეს ფინეთისა და ნორვეგიის ლიდერები ვლადიმირ პუტინთან გამართული მოულოდნელი სატელეფონო საუბრის გამო, - წერს Euronews-ი.

90-წუთიანი სატელეფონო კომუნიკაცია ფინეთის პრეზიდენტ ალექსანდრ სტუბისა და ნორვეგიის პრემიერ-მინისტრ იონას გარ სტორეს ინიციატივით შედგა. ორმა ლიდერმა პუტინს მოუწოდა, შეწყვიტოს სრულმასშტაბური აგრესია უკრაინის წინააღმდეგ და ჩაერთოს მოლაპარაკებებში სტაბილური, სამშვიდობო შეთანხმების მიღწევის მიზნით.

„საუბარი იყო ღია და შინაარსობრივი. ამ ომის შედეგს პირდაპირი გავლენა ექნება როგორც ჩვენს, ისე ფართო ევროპულ უსაფრთხოებაზე. ომის დასრულება პირდაპირ დისკუსიას მოითხოვს“, - განაცხადა სტუბმა.

ნორვეგიის პრემიერმა კი აღნიშნა, რომ საუბარში ხაზი გაესვა დეესკალაციის მნიშვნელობას. ოფიციალურ განცხადებაში განმარტებული იყო, რომ ლიდერები პუტინს ესაუბრნენ როგორც „საკუთარი ქვეყნების წარმომადგენლები და არა მთელი ევროპის სახელით“.

ზარის დასრულებისთანავე სტუბი და სტორე ვოლოდიმირ ზელენსკის დაუკავშირდნენ, რომელმაც მათ „აქტიური“ მხარდაჭერისთვის მადლობა გადაუხადა.

მიუხედავად ამისა, ამ ნაბიჯმა მეზობელი ქვეყნების მკვეთრი უკმაყოფილება გამოიწვია.

დანიის პრემიერ-მინისტრი, მეტე ფრედერიკსენი ინიციატივას მკაცრად დაუპირისპირდა და აღნიშნა, რომ მოსკოვი დიპლომატიისთვის მზად არ არის. მან ეს ნაბიჯი ვიქტორ ორბანის მოსკოვურ „სოლო-ვიზიტს“ შეადარა: „ძალიან სკეპტიკურად ვარ განწყობილი ნორვეგიისა და ფინეთის ამ დამოუკიდებელი ინიციატივის მიმართ. ეს არ ყოფილა ჩვენთან კოორდინირებული. ვერ ვხედავ არანაირ ნიშანს იმისა, რომ რუსეთს ევროპასთან მშვიდობა სურს“.

შვედეთის პრემიერ-მინისტრმა, ულფ კრისტერსონმა შედარებით რბილი, თუმცა ეჭვით სავსე პოზიცია დააფიქსირა: „ჩემი შთაბეჭდილებით, პუტინის გარდა მშვიდობა ყველას სურს. ასეთი ტიპის პირდაპირი საუბრების მიმართ საკმაოდ დაბალი მოლოდინები მაქვს. ისეთი დისკუსიების გამართვა, რომელმაც შესაძლოა ევროპული ხმა ორად გაყოს, რისკიანია“.

კრიტიკის საპასუხოდ, სტორემ აღნიშნა, რომ ევროპა რუსეთს უნდა ელაპარაკოს იმისათვის, რათა შეავსოს ის გზავნილები, რომლებსაც აშშ-ის ადმინისტრაცია აგზავნის.