The Guardian: მარტა კოსის გეგმის თანახმად, ევროკავშირის ნებისმიერ ახალ წევრ ქვეყანას 15-წლიანი გამოსაცდელი ვადა დაუწესდება - ამ პერიოდში, ძირითადი დემოკრატიული ღირებულებების ან ევროკავშირისადმი ერთგულების დარღვევის შემთხვევაში, მათ შესაძლოა ჩამოერთვათ ხმის უფლება ან ევროკავშირის დაფინანსება

ევროკომისიას სურს უზრუნველყოს, რომ ევროკავშირის წევრი ქვეყნების მომავალ თაობაში მეორე ვიქტორ ორბანი არ გამოჩნდეს - ევროკომისიამ წარადგინა გეგმები მომდევნო რამდენიმე წელიწადში აღმოსავლეთ ევროპაში ბლოკის გაფართოებისთვის მოსამზადებლად, - წერს ბრიტანული გამოცემა The Guardian-ი.

ევროკომისარი გაფართოების საკითხებში, მარტა კოსი გამოვიდა წინადადებით, შემოიღონ სპეციალური დამცავი მექანიზმები იმ ლიდერებისგან ბლოკის დასაცავად, რომლებმაც შესაძლოა ფეხქვეშ გათელონ დემოკრატიული ღირებულებები და მძევლად აქციონ გადაწყვეტილების მიღების პროცესი.

„არავითარი ვიქტორ ორბანი“, - განაცხადა კოსმა. - „ჩვენ გჭირდება უფრო სწრაფი მექანიზმები, ვიდრე მხოლოდ მე-7 მუხლია [სანქცია, რომელიც წევრი ქვეყნისთვის ხმის უფლების შეჩერების საშუალებას იძლევა], იმ შემთხვევისთვის, თუ ახალი წევრები კანონის უზენაესობას, დემოკრატიას ან ჩვენს ღირებულებებს გადაუხვევენ“.

მარტა კოსის მიერ გამოქვეყნებული გეგმის თანახმად, ევროკავშირის ნებისმიერ ახალ წევრ ქვეყანას 15-წლიანი გამოსაცდელი ვადა დაუწესდება. ამ პერიოდში, ძირითადი დემოკრატიული ღირებულებების დარღვევის ან ევროკავშირისადმი ერთგულების - გულწრფელი თანამშრომლობის პრინციპის - დარღვევის შემთხვევაში, მათ შესაძლოა ჩამოერთვათ ხმის უფლება ან ევროკავშირის დაფინანსება. აღნიშნულ გეგმას თანხმობა ევროკავშირის წევრმა ქვეყნებმა უნდა მისცენ.

ახალი წინადადებების თანახმად, დემოკრატიული სტანდარტების დარღვევის გამო ხმის უფლების შეჩერების - ან სხვა სახის სასჯელის - ზღვარი უფრო დაბალი იქნება.

ევროკავშირის ოფიციალურმა პირმა განაცხადა: „ეს დიდი ინოვაციაა და მნიშვნელოვანი გზავნილი გაფართოებისადმი სკეპტიკურად განწყობილი ქვეყნების მოქალაქეებისთვის, რომ ჩვენ გვაქვს ძალიან ძლიერი ჩარჩო იმ შემთხვევისთვისაც კი, თუ გაფართოების შემდეგ რაიმე არასწორად წავა“.