ზელენსკი: აშშ-ის შუალედური არჩევნების მოახლოებასთან ერთად, რუსეთი, სავარაუდოდ, უკრაინაზე თავდასხმებს გააძლიერებს

აშშ-ის შუალედური არჩევნების მოახლოებასთან ერთად, რუსეთი, სავარაუდოდ, უკრაინაზე თავდასხმებს გააძლიერებს. ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

ესპანურ გამოცემა El País-თან ინტერვიუში ზელენსკიმ განაცხადა, რომ რუსეთის პრეზიდენტი, ვლადიმირ პუტინი ცდილობს დაამტკიცოს, რომ მასზე დასავლური სანქციები და ევროპული ქვეყნების ზეწოლა ვერ მოქმედებს.

„პუტინი არჩევნების მოახლოებასთან ერთად ესკალაციას გაზრდის, რათა აჩვენოს, რომ ის იმდენად ძლიერია, ევროპელების არ ეშინია, სანქციებს ვერ გრძნობს და, რა თქმა უნდა, ამით თავის სიგნალებს ამერიკის შეერთებულ შტატებს უგზავნის“, - განაცხადა მან აშშ-ის შუალედურ არჩევნებზე საუბრისას, რომელიც 3 ნოემბერს იგეგმება.

ზელენსკის თქმით, მან ამერიკელ მომლაპარაკებლებს უკვე აცნობა მოსალოდნელი საფრთხის შესახებ, რომ რუსეთი არჩევნების პერიოდში იერიშებს - განსაკუთრებით მშვიდობიან მოსახლეობაზე - გაამწვავებდა.

„მათ სურთ, უკრაინელებმა, განსაკუთრებით კი დედაქალაქის მცხოვრებლებმა, კიევი დატოვონ“, - აღნიშნა პრეზიდენტმა და დასძინა, რომ თავდასხმების მიუხედავად, კიევი მტკიცედ დგას.

მან ასევე ხაზი გაუსვა, რომ რუსეთი იერიშებს უწყვეტ რეჟიმში ახორციელებს და ყოველდღიურად ასობით დრონს უშვებს.