რიკარდ იოზვიაკი: ევროკავშირის გაფართოების ახალი სტრატეგია ახალ წევრებს სანქციების დაბლოკვის უფლებას არ მისცემს

„რადიო თავისუფლების“ ევროპის ბიუროს რედაქტორი რიკარდ იოზვიაკი სოციალურ ქსელ X-ში წერს, რომ ევროკავშირის გაფართოების შემოთავაზებულ სტრატეგიაში მთავარი სიახლე შესაძლოა, ახალი წევრი ქვეყნების უფლებამოსილებებს შეეხებოდეს - მონტენეგრო, ალბანეთი, მოლდოვა და უკრაინა ევროკავშირის საბჭოში ერთსულოვნებით მისაღები გადაწყვეტილებების, მათ შორის სანქციების დაბლოკვას ვერ შეძლებენ.

იოზვიაკის ინფორმაციით, ევროკავშირის გაფართოების ახალი სტრატეგიის მთავარი სიახლე არც ეტაპობრივი ინტეგრაციაა, რომელიც ადრეც განიხილებოდა, და არც კვალიფიციური უმრავლესობით კენჭისყრის უფრო ფართოდ გამოყენება, რაც, მისი შეფასებით, ნაკლებად სავარაუდოა.

მისი თქმით, შემოთავაზებული გეგმის მიხედვით, ევროკავშირის ახალი წევრები - მონტენეგრო, ალბანეთი, მოლდოვა და უკრაინა - ვერ შეძლებენ ევროკავშირის საბჭოს იმ გადაწყვეტილებების წინააღმდეგ გამოსვლას, რომელთა მისაღებადაც ერთსულოვნებაა საჭირო.

იოზვიაკი მაგალითად სანქციებს ასახელებს. ამასთან, მისი ინფორმაციით, ახალი წევრი ქვეყნების წინააღმდეგ ე.წ. დამცავი მექანიზმების გამოყენების ვადა, რომლის ფარგლებშიც ქვეყანას შესაძლოა ხმის მიცემის უფლება შეუჩერდეს, 3 წლიდან 10 წლამდე გახანგრძლივდება.

big news about proposed 🇪🇺 enlargement strategy isn't gradual integration (old idea) or increased QMV (unlikely) but that newcomers🇲🇪🇦🇱🇲🇩🇺🇦
- can't oppose council decisions requiring unanimity (sanctions etc)
- safeguard measures (losing voting rights) extended from 3 to 10 years

— Rikard Jozwiak (@RikardJozwiak) September 30, 2026