Financial Times: ზელენსკიმ სანქციები დაუწესა ყოფილ თანაშემწეს, რომელიც მის კრიტიკოსად იქცა - ეს ნაბიჯი, სავარაუდოდ, გაზრდის ყურადღებას იმის მიმართ, თუ როგორ იყენებს უკრაინის პრეზიდენტი ასეთ ზომებს კრიტიკოსების წინააღმდეგ

ვოლოდიმირ ზელენსკიმ მასშტაბური სანქციები დაუწესა ყოფილ პრესმდივანს, რომელსაც რუსული დეზინფორმაციის ხელშეწყობაში ადანაშაულებენ, - წერს ბრიტანული გამოცემა Financial Times-ი სტატიაში სათაურით „ზელენსკიმ სანქციები დაუწესა ყოფილ თანაშემწეს, რომელიც მის კრიტიკოსად იქცა“.

„ეს ნაბიჯი, რომელსაც ქვეყნის შიგნით ფართო მხარდაჭერა აქვს, სავარაუდოდ, გაზრდის ყურადღებას იმის მიმართ, თუ როგორ იყენებს უკრაინის პრეზიდენტი ასეთ ზომებს კრიტიკოსების წინააღმდეგ“, - აღნიშნულია სტატიაში.

სანქციები იულია მენდელის - აშშ-ში მცხოვრები უკრაინის მოქალაქის, რომელიც ხშირად აკრიტიკებს ზელენსკის - და რამდენიმე რუსი ფიზიკური თუ იურიდიული პირის წინააღმდეგ კვირას, გვიან ღამით, პრეზიდენტის ბრძანებულებით დაწესდა.

მიზეზად დასახელდა „დეზინფორმაციისა და რუსული პროპაგანდის“ გავრცელება, ასევე „უკრაინის წინააღმდეგ რუსეთის აგრესიული პოლიტიკის“ მხარდაჭერა.

შეზღუდვები 10 წლის განმავლობაში იმოქმედებს და მოიცავს აქტივების გაყინვას, ასევე კაპიტალის გადაადგილების შეზღუდვას. მენდელის შემთხვევაში, ზომები ასევე ითვალისწინებს უკრაინის ტერიტორიიდან მისი სოციალური ქსელების - Facebook-ის, Instagram-ისა და X-ის (სადაც მას ათობით ათასი გამომწერი ჰყავს) გვერდებზე წვდომის შეზღუდვას.

„სანქციები უკრაინის მოქალაქეების წინააღმდეგ არაკონსტიტუციურია, ისევე როგორც ზელენსკის ბევრი სხვა გადაწყვეტილება“, - განაცხადა მენდელმა გამოცხადების შემდეგ. „ზელენსკი ებრძვის ყველას, ვინც ეჭვქვეშ აყენებს მის ვერსიას ამ ომის შესახებ“, - დასძინა მან.