ზელენსკი: ჩემი შეგრძნებით, პუტინს ტრამპი სჭირდება - მას არ სურს მისი განაწყენება

აშშ იკვლევს შესაძლებლობას, შეძლებენ თუ არა უკრაინა და რუსეთი ზამთარში ომის დეესკალაციისკენ ნაბიჯების გადადგმას და იმავდროულად მოლაპარაკებების განახლებას უფრო ფართო სამშვიდობო შეთანხმების მიღწევის მიზნით, - განუცხადა უკრაინის პრეზიდენტმა, ვოლოდიმირ ზელენსკიმ გამოცემა AXIOS-ს.

უკრაინის პრეზიდენტს სჯერა, რომ ზამთრამდე დარჩენილი კვირები დიპლომატიისთვის ხელსაყრელ შესაძლებლობას იძლევა. თუმცა ზელენსკიმ აღნიშნა, რომ დარწმუნებულია, რუსეთის პრეზიდენტი, ვლადიმირ პუტინი უკრაინის დასასუსტებლად კვლავ მკაცრ ზამთარზე აკეთებს ფსონს. მან დასძინა, რომ პუტინს არ სურს აშშ-ის პრეზიდენტთან ურთიერთობის გაფუჭება შუალედური არჩევნების წინ.

„ჩემი შეგრძნებით, პუტინს ტრამპი სჭირდება“, - განაცხადა ზელენსკიმ. - „მას არ სურს მისი განაწყენება“.

ზელენსკიმ აღნიშნა, რომ მაშინაც კი, თუ პუტინს ომის დეესკალაცია არ უნდა, ტრამპის ადმინისტრაციას ძალუძს აიძულოს იგი, წავიდეს ამ დათმობაზე.

შეკითხვაზე, ხომ არ სურს პუტინს ტრამპს არჩევნებამდე დიპლომატიური გამარჯვება აჩუქოს, ზელენსკიმ მოკლედ უპასუხა: „დიახ“.