FT: ევროკავშირი კალასის საგარეო პოლიტიკური სამსახურის რეფორმას აჩქარებს

ევროკომისია დაჩქარებულ რეჟიმში მუშაობს ევროკავშირის დიპლომატიური სამსახურის (EEAS) გაყოფისა და მისი ქვედანაყოფების ბლოკის აღმასრულებელ ხელისუფლებაში შეყვანის გეგმაზე, - წერს Financial Times-ი წყაროებზე დაყრდნობით.

გამოცემის ცნობით, ეს საფრანგეთისა და გერმანიის მოთხოვნით ხდება, რომლებიც წლის ბოლომდე ბრიუსელის საგარეო პოლიტიკური აპარატის რეფორმირებას ითხოვენ. ინფორმირებული წყაროების ცნობით, ეს ნაბიჯი ბოლო ორი ათწლეულის განმავლობაში ევროკავშირის ერთ-ერთი უდიდესი ინსტიტუციური რეფორმის ნაწილობრივ გაუქმებას ნიშნავს.

EEAS-ი, რომელსაც ევროკავშირის მთავარი დიპლომატი კაია კალასი ხელმძღვანელობს, დედაქალაქების ყურადღების ცენტრში მოექცა, რადგან მათ მიაჩნიათ, რომ უწყებას კრიზისებზე ეფექტური რეაგირების კოორდინაცია უჭირს. სამსახურის რეფორმირების გეგმები მიზნად უწყებების ფუნქციების დუბლირების აღმოფხვრას და ევროკავშირის დიპლომატიური საქმიანობის ევროკომისიის უფლებამოსილებებთან ვაჭრობის, დახმარების, ციფრული რეგულირებისა და ტექნოლოგიების სფეროებში უკეთ შეთანხმებას ისახავს.

რეფორმის სხვა ამოცანებს შორის არის სახსრების დაზოგვა, ვინაიდან წევრი ქვეყნები ბრიუსელზე ზეწოლას ახორციელებენ და ბლოკის მრავალწლიანი ბიუჯეტის ფარგლებში ხარჯების შემცირებას ითხოვენ.

წყაროების ცნობით, ეს ინიციატივა არ ითვალისწინებს ევროპული საგარეო მოქმედების სამსახურის სრულ შთანთქმას კომისიის მიერ, არამედ ეფექტიანობის ამაღლების მიზნით მისი ფუნქციების დეპარტამენტებს შორის გადანაწილებას გვთავაზობს.

რეფორმის მომხრეები ამტკიცებენ, რომ EEAS-ის (რომლის ბიუჯეტიც წელიწადში მილიარდ ევროს შეადგენს) მნიშვნელოვანი ნაწილის ევროკომისიის შემადგენლობაში შეყვანა ევროკავშირის საგარეო პოლიტიკას უფრო შეთანხმებულს გახდის, შეამცირებს ფუნქციების დუბლირებასა და ხარჯებს.

მოსალოდნელია, რომ უფლებამოსილებების გადანაწილების ზოგადი ჩარჩო შესაძლოა დეკემბერში, ევროკავშირის 2028–2034 წლების ბიუჯეტის შესახებ შეთანხმების ფარგლებში შეთანხმდეს. მათ საბოლოო შემუშავებას მომავალ თვეში ევროკავშირის ლიდერების სამიტისთვის გეგმავენ, რომლის გამოყენებაც პარიზსა და ბერლინს რეფორმების იდეების განსასჯელად სურთ.

ასევე, ვრცელდება ცნობები, რომ საფრანგეთსა და გერმანიას კალასისთვის რეფორმირებულ სტრუქტურაში უფრო წონადი პირადი როლის მინიჭება სურთ.