ფაშინიანი: სომხეთ-რუსეთის ურთიერთობები უაღრესად მნიშვნელოვანია ორივე ქვეყნისთვის და ჩვენ ამ ურთიერთობებს განსაკუთრებული გაფრთხილებით ვეპყრობით

სომხეთის პრემიერ-მინისტრმა, ნიკოლ ფაშინიანმა რუსეთის პრეზიდენტთან, ვლადიმირ პუტინთან შეხვედრის შემდეგ ვიდეო გამოაქვეყნა, სადაც შეხვედრის შედეგებზე ისაუბრა.

„ძალიან კარგი შეხვედრა მქონდა რუსეთის პრეზიდენტთან, ვლადიმირ პუტინთან. ჩვენ შევთანხმდით, რომ გულახდილ და კონსტრუქციულ დიალოგს მოსკოვში ჩემი მომავალი ვიზიტის დროსაც გავაგრძელებთ.

უნდა აღინიშნოს, რომ სომხეთ-რუსეთის ურთიერთობები უაღრესად მნიშვნელოვანია ორივე ქვეყნისთვის და ჩვენ ამ ურთიერთობებს განსაკუთრებული გაფრთხილებით ვეპყრობით. თუმცა, ასევე აუცილებელია ითქვას, რომ ახალ გარემოში, ახალ პირობებში არსებობს ამ ურთიერთობების გადაფორმულირების საჭიროება. დარწმუნებული ვარ, ამ გადაფორმულირების შედეგად ურთიერთობები გახდება უკეთესი, უფრო კონსტრუქციული, უფრო ურთიერთსასარგებლო და უფრო თბილი“, - განაცხადა ფაშინიანმა.