უკრაინამ როსტოვში მდებარე ელექტრონული ვაჭრობის პლატფორმის Ozon-ის საწყობი დაბომბა

უკრაინულმა ძალებმა გვიან ღამით რუსეთის როსტოვის ოლქში ელექტრონული კომერციის გიგანტის Ozon-ის კუთვნილ საწყობზე იერიში მიიტანეს. ინფორმაციას უკრაინული მედია ავრცელებს.

თავად კომპანიაში აცხადებენ, რომ დრონების სამიზნე რუსეთის სამხრეთში, როსტოვის ოლქში, რამდენიმე ობიექტი გახდა. მათი განცხადებით, დრონმა Ozon-ის ლოგისტიკური ობიექტი დააზიანა, რის შედეგადაც მცირე ხანძარი გაჩნდა, რომელიც მალევე ჩააქრეს.

„ობიექტზე ოპერაციები დროებით შევაჩერეთ, რათა საგანგებო სამსახურებმა ტერიტორია შეამოწმონ და სრულად უსაფრთხოებაში დარწმუნდნენ“, - ნათქვამია Ozon-ის განცხადებაში.

ამასთან ერთად, მედიის ინფორმაციით, უკრაინელმა სამხედროებმა როსტოვის ოლქის ქალაქ აქსაიში საყოფაცხოვრებო ტექნიკისა და ელექტრონიკის მაღაზიათა ქსელ DNS-ის კუთვნილ საწყობზეც იერიში მიიტანეს. თავდასხმის შედეგად საწყობს ცეცხლი გაუჩნდა.

როსტოვის ოლქის გუბერნატორის იური სლიუსარის განცხადებით, აქსაის რაიონში მდებარე ერთ-ერთი საწყობის ტერიტორიაზე დრონის ნამსხვრევები აღმოაჩინეს. მას არ დაუკონკრეტებია, კონკრეტულად რომელ ობიექტზე იყო საუბარი.

მისივე ინფორმაციით, რეგიონზე განხორციელებული „მასშტაბური“ თავდასხმის შედეგად შვიდი ადამიანი დაშავდა.