ესპანეთმა პუჩდემონის კოპენჰაგენში ჩასვლის შემთხვევაში მისი დაპატრიმრება მოითხოვა

ესპანეთის პროკურატურამ სასამართლოს მიმართა და კატალონიის ყოფილი ლიდერის კარლეს პუჩდემონის ბრიუსელიდან კოპენჰაგენში გადასვლის შემთხვევაში დაპატიმრების ევროპული ორდერის გაცემა მოითხოვა.

რამდენიმე დღის წინ კოპენჰაგენის უნივერსიტეტმა გამოაქვეყნა განცხადება, რომ პუჩდემონი ორშაბათს სტუდენტებისთვის წაიკითხავს ლექციას „კატალონია და ევროპა დემოკრატიის გზაგასაყარზე“.

პროკურატურის განცხადებაში ნათქვამია, რომ დაპატიმრების მოთხოვნა უკვე გაეგზავნა პუჩდემონის საქმის განმხილველ მოსამართლეს.

ესპანეთის სასამართლომ ბრიუსელში მყოფი პუჩდემონისა და მინისტრების დაკავების ორდერი 3 ნოემბერს გასცა. მათ ბრალად აჯანყების მოწყობა, თანამდებობის ბოროტად გამოყენება და სახელმწიფო ქონების გაფლანგვა ედებათ. საერთო ჯამში, დანაშაული 30 წლამდე თავისუფლების აღკვეთას ითვალისწინებს.

მანამდე, ესპანეთის სასამართლომ კატალონიის მთავრობის 8 ყოფილ მაღალჩინოსანს პატიმრობა 2 ნოემბერს შეუფარდა. მათ ბრალად ამბოხი და საბიუჯეტო სახსრების გაფლანგვა ედებათ. 8 ნოემბერს, ესპანეთის საკონსტიტუციო სასამართლომ კატალონიის დამოუკიდებლობის რეზოლუცია უკანონოდ ცნო.

კატალონიის პარლამენტმა ესპანეთისგან რეგიონის დამოუკიდებლობის გამოცხადების შესახებ რეზოლუციას მხარი გასული წლის 27 ოქტომბერს დაუჭირა.

დამოუკიდებლობის გამოცხადებიდან ერთ საათში, ესპანეთის სენატმა გადაწყვიტა, რომ კონსტიტუციის 155-ე მუხლი აემოქმედებინა, რაც ბარსელონის ხელისუფლების მადრიდზე დაქვემდებარებას გულისხმობს. შესაბამისად, რეგიონის ავტონომიის გაუქმებას.

#BREAKING Spain wants exiled ex-Catalan leader arrested if he travels to Denmark: prosecutors

— AFP news agency (@AFP) January 21, 2018