ტრამპის განცხადებით, თუ ჰუსიტები წითელ ზღვაში საუდის არაბეთის კუთვნილ გემებს დაბომბავენ, პასუხისმგებლობა ირანს დაეკისრება

აშშ-ის პრეზიდენტმა დონალდ ტრამპმა თავის სოციალურ ქსელში დაწერა, რომ, თუ ჰუსიტები წითელ ზღვაში საუდის არაბეთის კუთვნილ გემებს თავს დაესხმებიან, პასუხისმგებლობა ირანს დაეკისრება.

როგორც ტრამპმა განმარტა, ჰუსიტები ირანის მარიონეტული ძალაა და ისლამური რესპუბლიკის მითითებით მოქმედებენ. შესაბამისად, როგორც ტრამპი წერს, ჰუსიტების მიერ განხორციელებული დარტყმების საპასუხოდ აშშ ირანს სამხედრო ძალით უპასუხებს.

„ერთი წლის წინ ამერიკის შეერთებულმა შტატებმა ჰუსიტებს ძალიან ძლიერი დარტყმა მიაყენა, რადგან ისინი გემებზე თავდასხმებით ვაჭრობასა და კომერციას აფერხებდნენ. მას შემდეგ, მათ შორის ირანთან ჩვენი კონფლიქტის დროსაც, ისინი საკმაოდ პასუხისმგებლობით იქცეოდნენ. სამწუხაროდ, ახლა ისევ დაიწყეს მოქმედება. გასულ ღამეს ორ საუდის არაბულ გემს გაუხსნეს ცეცხლი. ეს განცხადება ჩაითვალოს ოფიციალურ გაფრთხილებად: თუ ისინი ამას კიდევ ერთხელ გააკეთებენ, ამერიკის შეერთებული შტატები პასუხისმგებლობას ირანს დააკისრებს, რადგან ჰუსიტები ირანის მარიონეტული და წარმომადგენლობითი ძალაა“, - დაწერა ტრამპმა.

ტრამპის განცხადებით, ასეთ შემთხვევაში ირანი მძიმე სამხედრო სასჯელს მიიღებს.

„რა თქმა უნდა, პასუხს აგებენ თავად ჰუსიტებიც, რომელთა ქცევაც განსაკუთრებით იმედგამაცრუებელია, რადგან აქამდე ისინი საკმაოდ პროფესიონალურად და გონივრულად მოქმედებდნენ“, - დასძინა მან.