ზელენსკი სომხეთის არჩევნებში ფაშინიანის გამარჯვების შემდეგ: ეს არის გამოცდა ევროკავშირისთვის

უკრაინის პრეზიდენტმა ვოლოდიმირ ზელენსკიმ სომხეთის არჩევნებში ნიკოლ ფაშინიანის პარტია „სამოქალაქო კონტრაქტის“ გამარჯვების შემდეგ განაცხადა, რომ ეს სიტუაცია გამოცდაა ევროკავშირისთვის, რომელმაც ახლა ამ ქვეყანას რეალური მხარდაჭერა უნდა აჩვენოს.

სოციალურ ქსელში გამოქვეყნებულ განცხადებაში, ზელენსკიმ სომხეთს დემოკრატიული, თავისუფალი არჩევნების ჩატარება, ნიკოლ ფაშინიანს კი გამარჯვება მიულოცა.

„ეს არის სომხეთის სუვერენიტეტის, თქვენი დამოუკიდებლობისა და იმგვარად ცხოვრების უფლების გამარჯვება, როგორსაც თავად განსაზღვრავთ“, - აღნიშნა მან და სომხეთს წარმატებები უსურვა.

პრეზიდენტმა ასევე ხაზგასმით აღნიშნა, რომ ევროკავშირმა სომხეთთან მიმართებით დრო არ უნდა დაკარგოს.

„სწორედ ახლაა დრო, რომ ევროკავშირმა რეალურად დაუჭიროს მხარი სომხეთს და გააკეთოს ყველაფერი საჭირო იმისათვის, რათა ხალხმა იგრძნოს, რომ ევროპასთან ურთიერთობის წყალობით ცხოვრება უკეთესობისკენ იცვლება. ეს არის გამოცდა ევროკავშირისთვის. მნიშვნელოვანია, არ დავკარგოთ დრო და შესაძლებლობები“, - განაცხადა ზელენსკიმ.