ფრანგული მედია: ემანუელ მაკრონის რეიტინგი ისტორიულ მინიმუმამდე დაეცა - მან ფრანსუა ოლანდის ანტირეკორდი მოხსნა

საფრანგეთის პრეზიდენტის, ემანუელ მაკრონის რეიტინგი ერთ თვეში 4 პროცენტული პუნქტით შემცირდა და ისტორიულ მინიმუმს, 13%-ს მიაღწია. ინფორმაციას ამის შესახებ ფრანგული მედია ავრცელებს.

ამ მონაცემებით მაკრონმა გადაასწრო თავისი წინამორბედის, ფრანსუა ოლანდის უნდობლობის რეკორდს, რომელიც 2016 წლის ნოემბერში 14%-ს შეადგენდა. კვლევის შედეგები კვლევითმა ინსტიტუტმა Elabe-მა ხუთშაბათს გამოაქვეყნა.

გამოცემა Les Echos-ისთვის ჩატარებული გამოკითხვის თანახმად, აგვისტოს შემდეგ საფრანგეთის პრეზიდენტის რეიტინგი ჯამში 11 პუნქტით არის შემცირებული.

„ეს არის Elabe-ის ბარომეტრის მიერ ოდესმე დაფიქსირებული ნდობის ყველაზე დაბალი მაჩვენებელი. რესპუბლიკის პრეზიდენტის რეიტინგი ჩამოცდა ფრანსუა ოლანდის მიერ დაფიქსირებულ ანტირეკორდს [14% 2016 წლის ნოემბერში] და თავად მაკრონის უდაბლეს მაჩვენებელს (14% 2025 წლის ოქტომბერში)“, - აღნიშნავენ ინსტიტუტში. რეიტინგის განსაკუთრებით მკვეთრი ვარდნა (-7 პუნქტი) უშუალოდ მაკრონის ამომრჩეველში დაფიქსირდა.

გამოკითხულთა 82% პრეზიდენტის მიმართ უნდობლობას გამოხატავს, ხოლო მათგან 60% აცხადებს, რომ მას „საერთოდ არ ენდობა“. მძიმე პოლიტიკური და სოციალური ფონის პარალელურად, პრემიერ-მინისტრ სებასტიან ლეკორნუს რეიტინგიც პირად მინიმუმამდე - 17%-მდე შემცირდა (-2 პუნქტი).

სხვა პოლიტიკურ ფიგურებს შორის ყოველთვიურ რეიტინგში პირველ ადგილს კვლავ მარინ ლე პენი ინარჩუნებს - მის მიმართ დადებითად გამოკითხულთა 35%-ია განწყობილი (შემცირდა 2 პუნქტით).