ისრაელი და ლიბანი პირდაპირი მოლაპარაკებების დაწყებაზე შეთანხმდნენ

ისრაელმა და ლიბანმა განაცხადეს, რომ მხარეებს შორის გამართული პირისპირ მოლაპარაკებების შემდეგ, ისინი შეთანხმდნენ ყოვლისმომცველი სამშვიდობო შეთანხმების მისაღწევად პირდაპირი მოლაპარაკებების დაწყებაზე.

ერთობლივი განცხადების თანახმად, სამშაბათს დილით გაიმართა შეხვედრა ორივე ქვეყნის ელჩების მონაწილეობით, რომელსაც ასევე ესწრებოდნენ აშშ-ის სახელმწიფო მდივანი მარკო რუბიო და აშშ-ის ელჩი ლიბანში.

„ამერიკის შეერთებულმა შტატებმა გამოთქვა იმედი, რომ მოლაპარაკებები გასცდება 2024 წლის შეთანხმების ფარგლებს და ყოვლისმომცველ სამშვიდობო ხელშეკრულებამდე მიგვიყვანს“, - ნათქვამია განცხადებაში.

აშშ-ში ისრაელის ელჩმა, იეხიელ ლაიტერმა შეხვედრის შემდეგ აღნიშნა, რომ ლიბანი და ისრაელი ერთ მხარეს დგანან.

„ჩვენ უნდა ამოვძირკვოთ „ჰეზბოლას“ ბოროტება. ჩვენ ერთიანნი ვართ ამის აუცილებლობასა და შესაძლებლობაში“, - განაცხადა მან.

ლიბანელი ოფიციალური პირები ადრე აცხადებდნენ, რომ მოლაპარაკებების დაწყების წინაპირობა ცეცხლის სრული შეწყვეტაა, რისი ვალდებულების აღებაზეც ისრაელი უარს ამბობს. „ჰეზბოლას“ ლიდერმა, ნაიმ კასემმა დისკუსიებს „უაზრო“ უწოდა და განაცხადა, რომ ისრაელთან მხოლოდ საუბარიც კი კაპიტულაციაა.