დონალდ ტრამპი: გავეცი განკარგულება, რომ ომის დეპარტამენტმა 5 დღით გადადოს ნებისმიერი სამხედრო დარტყმა ირანის ელექტროსადგურებსა და ენერგეტიკულ ინფრასტრუქტურაზე

მოხარული ვარ გაცნობოთ, რომ ამერიკის შეერთებულ შტატებსა და ირანს შორის ბოლო ორი დღის განმავლობაში ახლო აღმოსავლეთში არსებული დაპირისპირების სრული და საბოლოო მოგვარების თაობაზე მეტად პოზიტიური და პროდუქტიული მოლაპარაკებები გაიმართა, - წერს დონალდ ტრამპი სოციალურ ქსელში.

აშშ-ის პრეზიდენტი აღნიშნავს, რომ მოლაპარაკებები ამ კვირის განმავლობაშიც გაგრძელდება.

„ამ სიღრმისეული, დეტალური და კონსტრუქციული საუბრების ხასიათიდან და ტონიდან გამომდინარე, რომლებიც მთელი კვირის განმავლობაში გაგრძელდება, გავეცი განკარგულება, რომ ომის დეპარტამენტმა 5 დღით გადადოს ნებისმიერი სამხედრო დარტყმა ირანის ელექტროსადგურებსა და ენერგეტიკულ ინფრასტრუქტურაზე. ეს გადაწყვეტილება დამოკიდებული იქნება მიმდინარე შეხვედრებისა და დისკუსიების წარმატებით დასრულებაზე. გმადლობთ ყურადღებისთვის!“, - წერს ტრამპი.

მანამდე, ტრამპმა ირანს ულტიმატუმი წაუყენა და ჰორმუზის სრუტის გასახსნელად 48 საათი მისცა და განაცხადა, რომ წინააღმდეგ შემთხვევაში აშშ ირანის ელექტროსადგურებზე მიიტანს იერიშს. ულტიმატუმის ვადა დღეს ამოიწურა.