აშშ-ის არჩევნებში რუსეთის ჩარევის საქმის სპეცპროკურორმა პირველი ბრალდება წამოაყენა

აშშ-ის საპრეზიდენტო არჩევნებში რუსეთის მონაწილეობის შესახებ მიმდინარე გამოძიების სპეცპროკურორმა რობერტ მიულერმა პირველი ბრალდებები წამოაყენა საქმის ერთი ან რამდენიმე ფიგურანტის მიმართ. ამის შესახებ ტელეკომპანია CNN-ი იუწყება. მედიის ცნობით, ამ ბრალდების დეტალები იუსტიციის სამინისტრომ შეიძლება მომავალ კვირას გამოაქვეყნოს.

„ჩვენ არ ვიცით, ვის წინააღმდეგაა ეს ბრალდება და რა სახისაა,“- განაცხადა CNN-ის წამყვანმა. ამასთან, აღინიშნა, რომ ბრალდება შეიძლება იმ ფინანსურ დანაშაულს უკავშირდებოდეს, რომელიც მიულერის გამოძიების დროს გაიხსნა და ტრამპის შტაბის და რუსეთის კავშირების საერთოდ არ ეხება.

გამოძიების ფიგურანტებს შორის არიან პრეზიდენტ ტრამპის უფროსი შვილი და სიძე, ასევე მისი საარჩევნო კამპანიის ხელმძღვანელი პოლ მანაფორტია.

აშშ-ის საპრეზიდენტო არჩევნებში რუსეთის შესაძლო მონაწილეობასა და ტრამპის რუსეთთან კავშირების შესახებ გამოძიებას კონგრესი და გამოძიების ფედერალური ბიურო აწარმოებენ. რუსეთის საქმეზე სპეცპროკურორად გამოძიების ფედერალური ბიუროს ყოფილი უფროსი რობერტ მიულერი დაინიშნა. რუსეთი და თეთრი სახლის ადმინისტრაცია ამ ბრალდებებს უარყოფენ.

19 სექტემბერს, გავრცელდა ინფორმაცია, რომ ამერიკული სპეცსამსახურები პოლ მანაფორტის სატელეფონო საუბრებს უსმენდნენ. მედიის ცნობით, 9 აგვისტოს ფედერალურმა აგენტებმა მანაფორტის სახლი გაჩხრიკეს.