გუბერნატორი ფლორიდელებს: რაკი ევაკუაციას ვამბობთ, ეს დაუყოვნებლივ უნდა გააკეთოთ

ფლორიდის გუბერნატორი, რიკ სკოტი აცხადებს, რომ ქარიშხალი “ირმა“ სიცოცხლისთვის სახიფათოა და ფლორიდას უზარმაზარ ზიანს მოუტანს, ამიტომაც, მოსახლეობა დაუყოვნებლივ უნდა გაიხიზნოს. გუბერნატორის ეს განცხადება ამერიკულმა ტელეარხებმა გადასცეს.

“რაკი ევაკუაციას ვამბობთ, ეს დაუყოვნებლივ უნდა გააკეთოთ. გზები სწრაფად დაიტბორება, ამიტომაც უნდა გაემგზავროთ. ეს შტორმი გაცილებით დიდია, ვიდრე მთელი შტატი. ველოდებით უზარმაზარ ზიანს, რაც სიცოცხლისთვის სახიფათოა“, განაცხადა სკოტმა ეთერში.

გუბერნატორის თქმით, “ირმა“ უფრო დამანგრეველი იქნება, ვიდრე ქარიშხალი “ენდრიუ იყო“ 1992 წელს. მან არ გამორიცხა, რომ შესაძლოა ფლორიდის მიმდებარედაც გამოცხადდეს ევაკუაცია.

გუბერნატორის განმარტებით, ეროვნული გვარდიის 7 ათასი წევრია მობილიზებული. ადგილობრივ სკოლებს თავშესაფრებად გამოიყენებენ.

“ირმას“ შესახებ ინფორმაცია 1 სექტემბერს გავრცელდა. 4 სექტემბერს კი ოფიციალურად განაცხადეს, რომ ის პუერტო რიკოს სანაპიროს უახლოვდებოდა.

თავდაპირველად აშშ-ის საგანგებო სამსახურმა "ირმას" უმაღლესი მეხუთე კატეგორია მიანიჭა, თუმცა მოგვიანებით მეოთხემდე შეამცირა. ქარის სიჩქარე 250 კმ/სთ-ს აღწევს.ბოლო ინფორმაციით, ქარიშხლის შედეგად 18 ადამიანი დაიღუპა.

სპეციალისტების თქმით"ირმა" ქარიშხალ "ჰარვიზე" ძლიერია, რომელიც აშშ-ის 26 აგვისტოს დაატყდა თავს და 70-ზე მეტი ადამიანის სიცოცხლე იმსხვერპლა.