The Spectator: რუსეთის ეკონომიკა დასავლეთის სანქციებით შეიძლება ძლიერ დაზარალდა, თუმცა სამართლიანია ვივარაუდოთ, რომ სანქციები არ არის ისეთი აბსოლუტური, როგორც გვაჯერებენ

რუსეთის ეკონომიკა დასავლეთის სანქციებით შეიძლება ძლიერ დაზარალდა, თუმცა სამართლიანია ვივარაუდოთ, რომ სანქციები არ არის ისეთი აბსოლუტური, როგორც გვაჯერებენ, - წერს ბრიტანული გამოცემა The Spectator-ი სტატიაში სათაურით რუსეთის წინააღმდეგ სანქციები მუშაობს?

„გაზისა და ელექტროენერგიის მზარდი ფასები წარმოდგენას გვაძლევს რუსეთისთვის სანქციების დაწესების ფასის შესახებ - ფასი, რომელიც შეიძლება ღირებული იყოს, თუ ეს ხელს შეუწყობს რუსული აგრესიის დამარცხებას, მაგრამ, მიუხედავად ამისა, ეს კვლავ ფასია. რამდენად სრული და ეფექტურია სანქციები? ბრიტანეთის ეროვნული სტატისტიკის ოფისის (ONS) მიერ გამოქვეყნებული სავაჭრო მაჩვენებლები ცხადყოფს, რომ ბრიტანეთმა, ყოველ შემთხვევაში, ამ მომენტისთვის, მიაღწია ერთ-ერთ მთავარ მიზანს: მან თავი დააღწია რუსეთის ნავთობსა და გაზს. ივნისში რუსეთიდან საწვავის იმპორტი არ განხორციელებულა“, - წერს სტატიის ავტორი.

სტატიის ავტორი აღნიშნავს, რომ რუსეთის ეკონომიკა, რა თქმა უნდა, დაზარალდა საერთაშორისო ძალისხმევის შედეგად, თუმცა საჭიროა სიფრთხილე.

„ბრიტანეთი შეიძლება არ იღებდეს გაზს პირდაპირ რუსეთიდან, თუმცა ეს არ ნიშნავს იმას, რომ ჩვენ იზოლირებულნი ვართ გაზის მიწოდების პრობლემებისგან, რომლის წინაშე გერმანია და სხვა ევროპული ქვეყნები დგანან. მიუხედავად იმისა, რომ თხევადი ბუნებრივი აირის უფრო მეტ იმპორტს ვახორციელებთ აშშ-დან და ყატარიდან და ბოლო თვეებში ამ გაზის ნაწილის ევროპაში რეექსპორტს ვახორციელებთ, ზამთარში რუსული გაზის მიწოდების შემცირება გავლენას მოახდენს ჩვენივე გაზის მიწოდებაზე“, - წერს სტატიის ავტორი.

სტატიაში ასევე აღნიშნულია, რომ მიუხედავად იმისა, რომ რუსეთი დასავლეთში ნაკლებად ახორციელებს ნავთობისა და გაზის ექსპორტს, მან გაზარდა ექსპორტი ინდოეთსა და ჩინეთში.

„შეგვიძლია ვიყოთ დარწმუნებული, რომ ამ საწვავის რაღაც ნაწილი არ აღმოჩნდება ბრიტანეთში? როგორც ივნისში დავწერე, იმის ნიშნები არსებობს, რომ რუსული ნავთობი ევროპაში ინდოეთის გავლით აღწევს“, - აღნიშნავს სტატიის ავტორი.

„რუსეთის ეკონომიკა დასავლეთის სანქციებით შეიძლება ძლიერ დაზარალდა, თუმცა სამართლიანია ვივარაუდოთ, რომ სანქციები არ არის ისეთი აბსოლუტური, როგორც გვაჯერებენ და რომ დასავლეთში გარკვეული რაოდენობის რუსული ექსპორტის გაჟონვა ხდება“, - დასძინა სტატიის ავტორმა.