უკრაინის ხელისუფლება და მედიის ცნობით, გათავისუფლებული ბუჩის ქუჩებში ათობით მოკლული მშვიდობიანი პირის ცხედრები აღმოაჩინეს

ჟურნალისტები და უკრაინის ხელისუფლების წარმომადგენლები ავრცელებენ ინფორმაციას ათობით მოკლულ ადამიანზე, რომელთა ცხედრებიც კიევის მახლობლად, რუსეთის ჯარისგან გათავისუფლებულ ქალაქ ბუჩას ქუჩებში აღმოაჩინეს.

კერძოდ, ფაქტის ამსახველი ფოტოები გამოაქვეყნეს Reuters-მა და UNIAN-მა. ფოტოებზე ჩანს, რომ ადამიანებს სამოქალაქო ტანსაცმელი აცვიათ, ზოგს კი ხელები აქვთ შეკრული. მსგავსი ფოტო Twitter-ზე უკრაინის პრეზიდენტის ოფისის მრჩეველმა მიხაილ პოდოლიაკმაც გამოაქვეყნა. მისი თქმით, ის ადამიანები რუსმა სამხედროებმა მოკლეს.

AFP-ს კორესპონდენტები იტყობინებიან, რომ ქალაქის მხოლოდ ერთ ქუჩაზე სულ მცირე 20 ცხედარი ნახეს. ბუჩის მერმა ანატოლი ფედორუკმა AFP-ს განუცხადა, რომ დანგრეული ქალაქი ცხედრებით არის „მოფენილი“. მისი თქმით, ადამიანებს კეფაში გასროლით კლავდნენ. მან ასევე დასძინა, რომ ქალაქის დაბრუნების შემდეგ, უკრაინის ხელისუფლების წარმომადგენლებმა 280 ადამიანი ძმათა საფლავში დამარხეს.