www.imedi.ge
„თალიბებმა“ ქაბულში პრეზიდენტის სასახლე დაიკავეს
მსოფლიო

ფოტო: Reuters
მოძრაობა „თალიბანის“ წევრებმა ქაბულის პრეზიდენტის სასახლე დაიკავეს. ამის შესახებ BBC წერს.
გამოცემის ჟურნალისტის ინფორმაციით, სასახლის თანამშრომლებს შენობის დატოვება მოსთხოვეს. ამასთან, ვრცელდება ინფორმაცია, რომ „თალიბანსა“ და ავღანეთის მთავრობას შორის შეთანხმების თანახმად, სასახლეში ძალაუფლების გადაცემის ცერემონია უნდა გამართულიყო, რომელშიც ქვეყნის პრეზიდენტს, აშრაფ ღანის უნდა მიეღო მონაწილეობა. თუმცა ღანი ტაჯიკეთში გაიქცა.
15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა.
ავღანეთის 34 პროვინციის ადმინისტრაციული ცენტრებიდან 23 უკვე „თალიბების“ ხელშია. ქვეყნის ძირითადი ქალაქებიდან დედაქალაქი ქაბული ახლა ერთადერთი ადგილია, რომელზეც მთავრობის კონტროლი ამ დრომდე ვრცელდებოდა, თუმცა, დედაქალაქის „თალიბების“ მიერ აღებას ჯერ არცერთი მხარე არ ადასტურებს. აღსანიშნავია, რომ, რამდენიმე საათის წინ, დაჯგუფებამ ნანგარჰარის პროვინციის დედაქალაქი, ჯალალაბადი აიღო და როგორც მედია წერს, დაჯგუფებას ამ ქალაქზე კონტროლის დასამყარებლად, ბრძოლაც კი არ დასჭირვებია.
ამერიკის პრეზიდენტის, ჯო ბაიდენის გადაწყვეტილებით, ავღანეთში, დამატებით, 1 000 სამხედრო გაიგზავნება.
1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.
ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.





