ვლადიმერ პუტინი: სომხეთი და აზერბაიჯანი მთიან ყარაბაღში რუსი მშვიდობისმყოფელების განლაგებაზე შეთანხმდნენ

რუსეთის პრეზიდენტმა, ვლადიმერ პუტინმა განაცხადა, რომ სომხეთი და აზერბაიჯანი მთიან ყარაბაღში რუსი მშვიდობისმყოფელების განლაგებაზე შეთანხმდნენ.

„ყარაბაღის საკითხზე შეთანხმება ხელს შეუწყობს პრობლემის სამართლიანობის საფუძველზე დარეგულირებას, რაც აზერბაიჯანელი და სომეხი ხალხის ინტერესებშია. ყარაბაღში აზერბაიჯანისა და სომხეთის ძალები მათ მიერ დაკავებულ პოზიციებზე გაჩერდებიან“, - განაცხადა ვლადიმერ პუტინმა.

აღსანიშნავია, რომ რუსეთის მშვიდობისმყოფელების კონტინგენტი მთიან ყარაბაღში 5-წლიანი ვადით განლაგდება, რაც ავტომატურად 5 წლის ვადით გაგრძელდება, თუ რომელიმე მხარე წინააღმდეგობას არ გამოთქვამს.

სომხეთის პრემიერ-მინისტრმა ნიკოლ ფაშინიანმა მთიან ყარაბაღში საომარი მოქმედებების შეწყვეტა გამოაცხადა.

სომხეთის პრემიერის განცხადებით, მან აღნიშნულ განცხადებას ხელი რუსეთისა და აზერბაიჯანის პრეზიდენტებთან ერთად მოაწერა.