მერცი ტრამპს პუტინთან მოლაპარაკებებზე მოულოდნელი გადაწყვეტილებების მიღებისგან თავის შეკავებისკენ მოუწოდებს

გერმანიის კანცლერმა ფრიდრიხ მერცმა, აშშ-ის პრეზიდენტს დონალდ ტრამპს მოუწოდა, მომავალ კვირას ჩინეთში რუსეთის პრეზიდენტთან, ვლადიმირ პუტინთან, უკრაინის საკითხზე დაგეგმილი მოლაპარაკებების დროს მოულოდნელი გადაწყვეტილებები არ მიიღოს. ინფორმაციას Reuters-ი ავრცელებს.

„დუბლინში შეკრებილთაგან ზოგიერთს ეშინია, რომ ეს შესაძლოა, „ანკორიჯის მეორე მომენტად“ იქცეს“, - განაცხადა მერცმა. ამით მან ალასკის ქალაქ ანკორიჯში ტრამპისა და პუტინის შეხვედრა გაიხსენა, რომელსაც ევროპელი ლიდერები უკრაინაში ომის დასრულების მცდელობებისთვის შესაძლოა, გარდამტეხ მომენტად მიიჩნევდნენ.

„ამიტომ მსურს, შეერთებულ შტატებს ჩვენი გზავნილი სრულიად მკაფიოდ გავუგზავნო: გთხოვთ, არავითარი მოულოდნელობა. განაგრძეთ მოქმედება „ევროპის გუნდისა“ და „უკრაინის გუნდის“ შემადგენლობაში“, - აღნიშნა გერმანიის კანცლერმა.

მერცი ევროკავშირის ლიდერებს მოუწოდებს, გაერთიანების გრძელვადიანი ბიუჯეტის შესახებ მოლაპარაკებების ფარგლებში უკრაინის მხარდაჭერის ვალდებულება აიღონ. მისი თქმით, ინიციატივას ფართო მხარდაჭერა აქვს, თუმცა შეთანხმების მიღწევამდე ჯერ კიდევ დიდი გზაა.

გერმანიის კანცლერის განცხადებით, მიმდინარე კვირაში აბუ-დაბიში აშშ-ისა და რუსეთის წარმომადგენლებს შორის გამართული შეხვედრების შემდეგ, უახლოეს კვირებში სამშვიდობო მოლაპარაკებების არსებითი ეტაპი უნდა დაიწყოს. მისივე თქმით, პროცესში ევროპა პირველად მიიღებს მონაწილეობას.

მერცი უარყოფს რუსეთის მოწოდებას, მოლაპარაკებების ცენტრში ევროპის უსაფრთხოების არქიტექტურის საკითხი მოექცეს. მისი განმარტებით, ეს სისტემა უკვე არსებობს ნატოს სახით.

„მომავალი დისკუსიები ერთ მთავარ საკითხზე უნდა იყოს ფოკუსირებული: რა ჩარჩოს ფარგლებში იქნება შესაძლებელი უკრაინის უსაფრთხოების გარანტიები მშვიდობის მიღწევის შემდეგ? თუმცა, პირველ რიგში, მშვიდობას უნდა მივაღწიოთ“, - განაცხადა მერცმა.