მიხეილ სააკაშვილს ერევნის სახელმწიფო უნივერსიტეტის საპატიო დოქტორის წოდება ჩამოართვეს

საქართველოს ყოფილ პრეზიდენტს, მიხეილ სააკაშვილს ერევნის სახელმწიფო უნივერსიტეტის საპატიო დოქტორის წოდება ჩამოართვეს. ამის შესახებ სომხეთის განათლებისა და მეცნიერების მინისტრი არაიკ ჰარუთიუნიანი წერს.

„ერევნის სახელმწიფო უნივერსიტეტის აკადემიურმა საბჭომ მხარი დაუჭირა საქართველოს ყოფილი პრეზიდენტის, მიხეილ სააკაშვილისთვის უნივერსიტეტის საპატიო დოქტორის წოდების ჩამორთმევის საკითხს“, - წერს ჰარუთიუნიანი.

ეს გადაწყვეტილება უკავშირდება მიხეილ სააკაშვილის მიერ გაკეთებულ განცხადებებს მთიან ყარაბაღში მიმდინარე საომარ მოქმედებებთან დაკავშირებით. კერძოდ, 28 სექტემბერს სააკაშვილმა განაცხადა, რომ „მთიანი ყარაბაღი აზერბაიჯანის სუვერენულ ტერიტორიას წარმოადგენს და ამას არაფერი შეცვლის“.

ერევნის სახელმწიფო უნივერსიტეტის საპატიო დოქტორის წოდება სააკაშვილს 2009 წელს მიენიჭა.