CNN: დღეს საფრანგეთში გამართული დემონსტრაციების დროს თითქმის, 1000 ადამიანი დააკავეს

საფრანგეთის შინაგან საქმეთა მინისტრის, ლორან ნუნიესის თქმით, დღეს საფრანგეთში გამართული დემონსტრაციების დროს თითქმის 1000 ადამიანი დააკავეს, - ინფორმაციას საფრანგეთის შინაგან საქმეთა მინისტრზე დაყრდნობით CNN ავრცელებს.

მისი თქმით, გასულ კვირაში აქციების დროს 385 ადამიანი იყო დაკავებული.

მინისტრის განცხადებით, პარიზში იყო „მასშტაბური დემონსტრაცია, რომელიც მშვიდობიანად ჩატარდა, ისევე როგორც მთელი ქვეყნის მასშტაბით ჩატარებული საპროტესტო მსვლელობის უმეტესობა“.

„თუმცა, როგორც ველოდით, ჩამოყალიბდა რამდენიმე მაღალი რისკის ჯგუფი, რომლებიც შედგებოდა შენიღბული პირებისგან, ძირითადად შავებში ჩაცმული, რადიკალური მემარცხენე და ულტრამემარცხენე აქტივისტებისგან“, - განაცხადა ნუნიესმა.

მისივე ინფორმაციით, ზოგიერთ ქალაქში იყო ბიზნესის დაზიანების ან ძარცვის შემთხვევები, თუმცა, გაცილებით ნაკლები, ვიდრე გასული კვირის საპროტესტო აქციებზე.

მინისტრისვე თქმით, დღეს საჯარო შენობებზე, როგორიცაა მერია და პოლიციის განყოფილებები, მიზანმიმართული თავდასხმები არ ყოფილა.

თუმცა, როგორც ნუნიესმა აღნიშნა, უსაფრთხოების ძალები ძალადობის უკიდურესად მაღალი დონის წინაშე აღმოჩნდნენ, რადგან მათი მიმართულებით მუდმივად ისროდნენ საგნებსა და ფეიერვერკებს.

„პარიზში იყო 500 მომიტინგე, რომლებსაც გადაწყვეტილი ჰქონდათ, თავს დასხმოდნენ უსაფრთხოების ძალებს ან მოეწყოთ ძარცვა“, - განაცხადა შს მინისტრმა და დასძინა, რომ უსაფრთხოების ძალები გვიან საღამომდე დარჩებოდნენ განლაგებულნი ძარცვის თავიდან ასაცილებლად.

ქვეყნის შინაგან საქმეთა სამინისტროს ცნობით, დღეს საპროტესტო აქციებში ქვეყნის მასშტაბით 400 000 ადამიანი მონაწილეობდა, მათგან 110 000 ადამიანი პარიზში.

როგორც ცნობილია, საფრანგეთში შაბათ-კვირის დემონსტრაციების დროს უსაფრთხოების ოპერაციის ფარგლებში 70 000 ოფიცერია განლაგებული.