ინგლისში სატვირთო მანქანაში ნაპოვნი ცხედრების საქმეზე მეოთხე ეჭვმიტანილი დააკავეს

ინგლისში, ესექსის საგრაფოში, სატვირთო მანქანის კონტეინერში აღმოჩენილი 39 ცხედრის საქმეზე, პოლიციამ მეოთხე ეჭვმიტანილი დააკავა. ინფორმაციას ამის შესახებ BBC ავრცელებს.

კერძოდ, 48 წლის ჩრდილოეთ ირლანდიელი ლონდონის სტანსტედის აეროპორტში დააკავეს. მანამდე დაკავებული 3 ადამიანიდან ორი ჩეშირის საგრაფოს ქალაქ უორინგტონის მკვიდრია, მესამე კი ასევე ჩრდილოეთ ირლანდიელი, სატვირთო ავტომობილის 25 წლის მძღოლი მო რობინსონია.

ამასთან ერთად, ვრცელდება ინფორმაცია, რომ 39 ცხედრიდან სულ მცირე 6 ვიეტნამელებს ეკუთვნის. BBC-მ იპოვა ვიეტნამელი ოჯახები, რომლებიც დიდ ბრიტანეთში მყოფ საკუთარ ნათესავებს ვერ უკავშირდებიან. გამოცემამ შესაძლო მსხვერპლთა ოჯახების მიერ მოწოდებული ინფორმაცია პოლიციას გადასცა.

ესექსის საგრაფოში სატვირთო მანქანის კონტეინერში​ 31 კაცისა და 8 ქალის ცხედარი 23 ოქტომბერს იპოვეს. ესექსის პოლიციის განცხადებით, სატვირთო მანქანა ბულგარეთიდან დიდ ბრიტანეთში ქალაქ ჰოლიჰედის გავლით მოხვდა. წინასწარი მონაცემებით, გარდაცვლილებს შორის 38 ზრდასრული, ერთი კი არასრულწლოვანია.