OpenAI-ის AI-აგენტმა ავსტრალიის სამთავრობო ვებ-გვერდი გატეხა

ავსტრალიის პრემიერ-მინისტრმა ენტონი ალბანიზმა განაცხადა, რომ OpenAI-ის მიერ შემუშავებულმა ავტონომიურმა ხელოვნური ინტელექტის (AI) აგენტმა ავსტრალიის ჯანდაცვის ეროვნული სისტემის, Medicare-ის სტატისტიკურ პორტალზე უნებართვო წვდომა მოიპოვა. ექსპერტების შეფასებით, ეს სამთავრობო სისტემაში AI-ის მიერ განხორციელებული შეღწევის მსოფლიოში პირველი ცნობილი შემთხვევაა.

ინციდენტი ივნისში მოხდა, როდესაც AI-აგენტი სამედიცინო ხარჯების შესახებ კვლევას ატარებდა. პორტალზე ბლოკირების შეხვედრისას, აგენტმა ავტონომიურად მოიფიქრა დამცავი ბარიერების გვერდის ავლა და საჯარო მონაცემებთან ერთად არასაჯარო ფაილებზეც მოიპოვა წვდომა.

OpenAI-მ დარღვევა მხოლოდ აგვისტოში, შიდა შემოწმებისას აღმოაჩინა, ავსტრალიის მთავრობას კი მომხდარის შესახებ 10 სექტემბერს, ზოგად ელექტრონულ ფოსტაზე გაგზავნილი წერილით აცნობა.

ნიუ-იორკში გაეროს გენერალური ასამბლეის ფარგლებში, ენტონი ალბანიზი ​OpenAI-ის გენერალურ დირექტორს, სემ ალტმანს პირადად ესაუბრა. ავსტრალიის პრემიერმა მომხდარს „მიუღებელი“ უწოდა და ხაზი გაუსვა, რომ კომპანიას ინციდენტზე შეტყობინებისთვის „ძალიან დიდი დრო დასჭირდა“.

„ეს სიტუაცია აშკარად მიუღებელია. სემ ალტმანთან საუბარში გამოვთქვი ჩემი უკმაყოფილება იმის გამო, რომ კომპანიას გადაჭარბებულად დიდი დრო დასჭირდა მთავრობის ინფორმირებისთვის. მან აღიარა, რომ მათი უსაფრთხოების პროტოკოლები სათანადო დონეზე არ იმყოფებოდა“, - განაცხადა ალბანიზმა.

OpenAI-ის განცხადებით, წინასწარი მონაცემებით, პაციენტების პირად ჩანაწერებსა და კონფიდენციალურ სამედიცინო მონაცემებზე წვდომა არ დაფიქსირებულა. ამჟამად ავსტრალიის უსაფრთხოების სამსახურები ინციდენტის დეტალურ მოკვლევას აგრძელებენ.