Apple-მა არეულობის დროს მაღაზიიდან მოპარული სმარტფონები დაბლოკა

Apple-მა ფილადელფიაში არეულობის დროს მოპარული სმარტფონები დაბლოკა. ამის შესახებ CNN-ი იტყობინება.

კომპანიის განცხადებით, მოწყობილობები გამორთულია და ექვემდებარება თვალთვალს, მოპარულ სმარტფონებზე კი იკითხება შესაბამისი გამაფრთხილებელი შეტყობინება, რომელიც მაღაზიაში ნივთის დაბრუნების მოწოდებას შეიცავს.

ამერიკული მედია იტყობინება, რომ მასობრივი არეულობის დროს ნიუ-იორკში, ვაშინგტონსა და ფილადელფიაში ძარცვის ფაქტები დაფიქსირდა.

აშშ-ში საპროტესტო აქციები ჯორჯ ფლოიდის მკვლელობას მოჰყვა. 28 მაისს საპროტესტო აქციის მონაწილეებმა მინეაპოლისის პოლიციის შენობა დაიკავეს და ცეცხლი წაუკიდეს. 30 მაისს ფლოიდის საქმეზე დაკავებულ ყოფილ პოლიციელს ბრალი წინასწარი განზრახვის გარეშე მკვლელობის მუხლით წაუყენეს. საპროტესტო აქციების გამო 25-ზე მეტ ქალაქში კომენდანტის საათი გამოცხადდა. 2 ივნისს დამოუკიდებელმა ექსპერტიზამ დაადგინა, რომ ფლოიდის გარდაცვალების მიზეზი ასფიქსია გახდა.