სინგაპურში მოსახლეობას სოციალური ქსელების სქროლვის სანაცვლოდ წიგნების კითხვაში ფულს უხდიან📚

სინგაპურის ხელისუფლებამ აამოქმედა პროგრამა, რომლის მონაწილეებსაც ყოველდღიური კითხვისთვის მცირე ფულადი ჯილდოს მიღება შეუძლიათ. The Straits Times-ის ცნობით, ამ გზით ქვეყანაში სურთ ებრძოლონ „დუმსქროლინგს“ [პროცესი, როდესაც ნეგატიურ ამბებს დღეში რამდენიმე საათის განმავლობაში „ვსქროლავთ“]
და მცხოვრებლებს კონცენტრაციისა და კრიტიკული აზროვნების უნარი განუვითარონ.

ქულების მისაღებად მონაწილემ დღეში სულ მცირე 15 წუთი უნდა იკითხოს და ეს სპეციალურ სახელმწიფო პლატფორმაზე დააფიქსიროს. თითო ასეთ სესიაზე 20 ვირტუალური მონეტა ირიცხება, ხოლო 1000 მონეტის ერთ სინგაპურულ დოლარში გადაცვლაა შესაძლებელი. ამრიგად, ერთი დოლარის მისაღებად საჭიროა ყოველდღიური კითხვა 50 დღის განმავლობაში.

სინგაპურის ეროვნული ბიბლიოთეკის საბჭოს ხელმძღვანელის, მელისა ტამის თქმით, პროგრამამ ხელი უნდა შეუწყოს კითხვის ჩვევის ჩამოყალიბებას. „მთავარი გზავნილი, რომელიც სინგაპურის მცხოვრებლამდე გვინდა მივიტანოთ, არის ის, რომ კითხვა გონების შესანიშნავი ვარჯიშია. კითხვის დაწყება და ამ ჩვევის შენარჩუნება მარტივია და ვიმედოვნებთ, რომ შევძლებთ, ეს ჩვენს საერთო ჩვევად ვაქციოთ“, - განმარტა ტამმა.

მსგავსი პროგრამები სინგაპურში მანამდეც მოქმედებდა. 2015 წელს ქვეყანაში ჩაეშვა პროგრამა National Steps Challenge, რომელიც მცხოვრებლებს ფეხით მეტი სიარულისა და ფიზიკური აქტივობისკენ წახალისებას სთავაზობდა. ნაბიჯებისთვის ასევე ირიცხებოდა ქულები, რომელთა გადაცვლაც ჯილდოებსა და ვაუჩერებში იყო შესაძლებელი.