ალექსანდარ ჯიკიჩმა მსოფლიოს შესარჩევი ეტაპის პირველი მატჩებისთვის საქართველოს ნაკრების გაფართოებული შემადგენლობა დაასახელა🏀

საქართველოს ეროვნული ნაკრების გაფართოებული შემადგენლობა ცნობილია. ნაკრების მთავარმა მწვრთნელმა, ალექსანდარ ჯიკიჩმა ის 24 მოთამაშე დაასახელა, რომლიდანაც მსოფლიოს 2027 წლის ჩემპიონატის საკვალიფიკაციო მატჩებისთვის ძირითად შემადგენლობას შეარჩევს.

გაფართოებულ შემადგენლობაში ნაკრების გამოცდილ ლიდერებთან ერთად ახალი სახეებიცაა - ლუკა ალავიძე („ქუთაისი 2010“), გიორგი კობახიძე, რომა ჭინჭარაული (ზესტაფონის „მარგვეთი“) და ლუკა კალატოზიშვილი („ვსა“). ნაკრებში გამოძახებული იყვნენ, მაგრამ ტრავმის გამო შეკრებაზე ვერ იქნებიან “ბათუმი 2010”-ის წევრი გიორგი ოჩხიკიძე და ნატურალიზებული ამერიკელი კალათბურთელი, მიუნხენის „ბაიერნის“ უკანახაზელი, კამარ ბოლდუინი. მისი ადგილი თად მაკფადენმა დაიკავა, რომელიც საქართველოს ნაკრების ღირსებას 2018-2023 წლებში იცავდა.

სანაკრებო შეკრება თბილისში, 20 ნოემბერს დაიწყება. საკვალიფიკაციო ტურნირის პირველი ფანჯრის ფარგლებში 2 მატჩს ჩაატარებს: 27 ნოემბერს თბილისში უკრაინას უმასპინძლებს, ხოლო 30 ნოემბერს სანტა კრუზ დე ტენერიფეში ესპანეთის ეროვნულ გუნდს დაუპირისპირდება. მათ გარდა ჯგუფშია დანიის ნაკრებიც. მეორე ჯგუფურ ეტაპზე ასპარეზს 3 საუკეთესო გუნდი გააგრძელებს.

გიორგი შერმადინისთვის ნოემბრის თამაშები საქართველოს ეროვნული ნაკრების შემადგენლობაში ბოლო მატჩები იქნება.