გივი მიქანაძე: ბოლო სამი წლის განმავლობაში, სწორედ ირაკლი კობახიძის ინიციატივით და მხარდაჭერით, განათლების, მეცნიერებისა და ახალგაზრდობის სამინისტროს ბიუჯეტი ქვეყანაში ნომერი მესამეა და ყოველწლიურად იზრდება. ქვეყნის პოლიტიკა და ხელისუფლების გადაწყვეტილება მაქსიმალურად არის მიმართული იქითკენ, რომ მოსახლეობის განათლების ხარისხის ამაღლება და განათლების უმაღლესი სტანდარტის უზრუნველყოფა იყოს გარანტირებული

ის მოცემულობები, რომლებიც ამ კვლევამ წარმოაჩინა და მისი სწორი ანალიზი არის უმნიშვნელოვანესი. კიდევ ერთხელ დავრწმუნდით, რომ ის, რაც ერთი წლის წინ დაანონსდა და შემდგომში მთავრობის დადგენილებით მივიღეთ რეფორმის თვალსაზრისით, აბსოლუტურად ემთხვევა იმ გამოწვევებს, რომლებზეც ამ კონტექსტში ჩვენ გვიწევს მუშაობა, - განაცხადა განათლების, მეცნიერებისა და ახალგაზრდობის მინისტრმა გივი მიქანაძემ.

მისივე თქმით, ეს კიდევ ერთი დადასტურებაა იმისა, რომ რეფორმა სწორი მიმართულებით მიმდინარეობს.

„განსაკუთრებით მინდა აღვნიშნო, რომ როგორც რეფორმისთვის მზადება და რეფორმის შესაბამისი დოკუმენტის მომზადება, ასევე წინმსწრები ნაბიჯები, რომლებიც გადაიდგა იმისთვის, რომ შედეგები თვალსაჩინო ყოფილიყო, რამდენიმე წლის მუშაობის და დიდი ძალისხმევის შედეგია, რომლისთვისაც მადლობას ვუხდი თითოეულ პედაგოგს, სკოლის ადმინისტრაციას, რესურსცენტრის წარმომადგენლებს, მშობლებს და მოსწავლეებს, რა თქმა უნდა, სამინისტროს ყველა იმ წარმომადგენელს, რომელიც ჩართული იყო ამ პროცესში.

სწორედ ბოლო სამი წლის განმავლობაში, ირაკლი კობახიძის მეთაურობით, ჩვენმა ქვეყანამ განსაკუთრებულ პროგრესს მიაღწია ამ თვალსაზრისით, განსაკუთრებით, ეს ფინანსურ ჭრილშიც აისახება და დღეს ამაზე მეტყველებს თუნდაც ჩენდლერის ინსტიტუტის მიერ გამოქვეყნებული კვლევა, რომელიც ჯანდაცვის და განათლების სფეროში კარგი მართვის პოლიტიკას აფასებს და საქართველო ევროპის საუკეთესო ათეულშია მოხვედრილი. ამ მონაცემებით შვიდეულის რამდენიმე ქვეყანას და ევროკავშირისა და ნატოს 25 წევრ ქვეყანას ვუსწრებთ“, - აღნიშნა მიქანაძემ.

განათლების, მეცნიერებისა და ახალგაზრდობის მინისტრმა ასევე აღნიშნა, რომ ბოლო სამი წლის განმავლობაში, სწორედ ირაკლი კობახიძის ინიციატივითა და მხარდაჭერით, განათლების, მეცნიერებისა და ახალგაზრდობის სამინისტროს ბიუჯეტი ქვეყანაში ნომერი მესამეა და ყოველწლიურად იზრდება.

„ბოლო სამი წლის განმავლობაში სწორედ ირაკლი კობახიძის ინიციატივითა და მხარდაჭერით განათლების, მეცნიერებისა და ახალგაზრდობის სამინისტროს ბიუჯეტი ქვეყანაში ნომერი მესამეა და ყოველწლიურად იზრდება. ქვეყნის პოლიტიკა და ხელისუფლების გადაწყვეტილება მაქსიმალურად არის მიმართული იქითკენ, რომ მოსახლეობის განათლების ხარისხის ამაღლება და განათლების უმაღლესი სტანდარტის უზრუნველყოფა იყოს გარანტირებული.

სწორედ ამიტომაც იყო ინიცირებული ის რეფორმები, რომელიც მიმდინარეობს და დღევანდელი კვლევის შედეგები და გამოწვევები პირდაპირ ასახავს იმ მოცემულობას, რომ რეფორმით გათვალისწინებული კომპონენტები სრულ თავსებადობაშია ამ გამოწვევებზე საპასუხოდ და ეს კიდევ ერთი დადასტურებაა იმისა, რომ ჩვენ სწორ გზაზე ვდგავართ საზოგადოებასთან ერთად ამ რეფორმის განხორციელების პროცესში“, - განამარტა მინისტრმა.

PISA-ს უახლესი კვლევის თანახმად, საქართველომ ყველა ძირითად სფეროში გააუმჯობესა მაჩვენებლები - მათემატიკასა და საბუნებისმეტყველო საგნებში ბოლო ათწლეულის განმავლობაში მიღწეულია საუკეთესო შედეგი.