ექიმი ქვეშეთი-კობის გზის მშენებლობის დროს დაშავებულზე: თავის, გულმკერდისა და მუცლის ღრუს ორგანოების ტრავმული დაზიანების ნიშნები არ ვლინდება, თუმცა მდგომარეობა საყურადღებოა

ქვეშეთი-კობის გზის მშენებლობის დროს მიწის ჩამოშლის შედეგად დაშავებული პაციენტის მგომარეობა სტაბილურია. ის თბილისის ცენტრალურ საავადმყოფოში გადის მკურნალობას. ექიმის თქმით, პაციენტი კონტაქტურია, ჩაუტარდა კომპიუტერული ტომოგრაფია და მედიკოსების მეთვალყურეობის ქვეშ რჩება.

„პაციენტი სამშენებლო საგზაო-სამუშაოების დროს მოყვა ჩამოშლილი მიწის მასის ქვეშ. ჩაუტარდა კომპიუტერული ტომოგრაფია. ამ ეტაპის მონაცემებით თავის, გულმკერდის და მუცლის ღრუს ორგანოების ტრავმული დაზიანების ნიშნები არ ვლინდება. მიუხედავად ამისა, პაციენტის მდგომარეობა საყურადღებოა და რჩება ჩვენს კლინიკაში ინტენსიური მკურნალობისა და მეთვალყურეობის ქვეშ“, - განაცხადა ექიმმა ბეჟან ხოზრევანიძემ.

საავტომობილო გზების დეპარტამენტის ინფორმაციით, ქვეშეთი -კობის გზის მშენებლობისას სოფელ წკერესთან საყრდენი კედლის მოწყობის სამუშაოებისას, სავარაუდოდ, მიწის მასა ჩამოიშალა. შედეგად, სამშენებლო კომპანიის ხუთი თანამშრომელი ჩამოშლილი მასის ქვეშ მოყვა. ოთხი მათგანის ცხედარი ნაპოვნია, ერთი კი სამკურნალოდ თბილისის ცენტრალურ საავადმყოფოში გადმოიყვანეს. დაშავებული განის მოქალაქეა.