ირაკლი ჩიხლაძე ელდარ მდინარაძეზე: ის იყო უბრალოდ დიდი ადამიანი. თითოეულ „იმედელს“ უჭირს მასთან დამშვიდობება. თუმცა, მე მაინც ვიტყვი, რომ ანტრაქტის შემდეგაც მას არ ვემშვიდობები

ის იყო უბრალოდ დიდი ადამიანი. თითოეულ „იმედელს“ უჭირს მასთან დამშვიდობება. თუმცა, მე მაინც ვიტყვი, რომ ანტრაქტის შემდეგაც მას არ ვემშვიდობები! - განაცხადა „იმედის კვირის“ წამყვანმა, ტელეკომპანია „იმედის“ გენერალური დირექტორის მოადგილემ, ირაკლი ჩიხლაძემ ელდარ მდინარაძეზე საუბრისას.

მისივე თქმით, ბოლო 3 კვირის განმავლობაში რაც ყველაზე მეტად აკლდა, გადაცემის დასრულებისთანავე არხის სამხატვრო ხელმძღვანელის სატელეფონო ზარი იყო.

„მას შემდეგ რაც „ტელეიმედში“ მოვიდა, არ ყოფილა შემთხვევა, ელდარ მდინარაძეს „იმედის კვირის“ დასრულებისთანავე არ დაერეკა და სანამ სტუდიიდან გავიდოდი, დეტალურად არ განეხილა - რა მოეწონა, რა - არა. ეს ეხებოდა დრამატურგიას, შინაარსს, კადრს, მუსიკალურ ფონს, სტუდიაში კამერების მოძრაობასა და განათებასაც კი.

ბატონი ელდარი ცდილობდა, ბრეხტის ესთეტიკა შემოეტანა „იმედში“ და სულ მეუბნებოდა, რომ ყველაზე დიდი ხელოვნებაა, გახადო მაყურებელი შენს მიერ ნაამბობის თანამონაწილე და თანაზიარი. ეს კი ყველაზე მეტად უშუალობით მიიღწევაო. არ გამორჩებოდა განწყობაც კი, რომელიც იმ კონკრეტული გადაცემის წაყვანისას მქონდა. 76 წლის ასაკში, უამრავ პროექტზე მუშაობდა. ნაწილი დაასრულა, ნაწილი კი განუხორციელებელი დარჩა.

და კიდევ ერთი დეტალი, რაც უნდა იცოდეს მაყურებელმა, საკუთარ იდეებს გიზიარებდა და მისი უდიდესი გამოცდილების მიუხედავად, აუცილებლად გკითხავდა, შენ როგორ ხედავდი ამ ყველაფერს, რა კორექტივებს შეიტანდი, როგორ უპასუხებდა ესა თუ ის პროექტი ხვალინდელ დღეს. ელდარ მდინარაძე არა სიტყვის მასალად, არამედ გულწრფელად, რეალურად ითვალისწინებდა ყველა თანაშრომლის აზრს. მისთვის ტელევიზიაში არ არსებობდნენ პრივილეგირებული სახეები, არ ცნობდა რანგირებას - თანაბრად მნიშვნელოვანი იყო წამყვანი, ოპერატორი, სტაჟიორი, პროდიუსერი, მემონტაჟე, გამნათებელი, მძღოლი, დეკორატორი, მებაღე და ყველა, ვინც ქმნის „იმედს“. უდიდესი მადლიერებით ხვდებოდა ყველა „იმედელს“.

რამდენიმე ასეული ადამიანია დასაქმებული „იმედში“ და ბატონი ელდარი თითოეულთან ახერხებდა პირად კომუნიკაციას 76 წლის ასაკშიც კი. ის იყო უბრალოდ დიდი ადამიანი. თითოეულ „იმედელს“ უჭირს მასთან დამშვიდობება. თუმცა, მე მაინც ვიტყვი, რომ ანტრაქტის შემდეგაც მას არ ვემშვიდობები!“, - განაცხადა ჩიხლაძემ.

ტელეკომპანია „იმედის“ სამხატვრო ხელმძღვანელი, კინორეჟისორი ელდარ მდინარაძე 11 ნოემბერს გარდაიცვალა. იგი მშობლიურ ოზურგეთში დაკრძალეს - ქართული კულტურისა და ხელოვნების ერთგული მოამაგე საზოგადოებამ უკანასკნელ გზაზე ოზურგეთის საკათედრო ტაძრიდან გააცილა.