რას ამბობენ „ქრონიკასთან“ სუდანში ჩარჩენილი საქართველოს მოქალაქეების ახლობლები - გასამხედროებულ დაჯგუფებასა და ქვეყნის არმიას შორის შეტაკებები გრძელდება

საქართველოს მოქალაქეები, რომლებიც „ქრონიკასთან“ კონტაქტზე გამოვიდნენ, ამბობენ, რომ 72 საათია, რაც სუდანში ვითარება გართულდა. გასამხედროებულ დაჯგუფებასა და არმიას შორის დაპირისპირებები მუდმივ რეჟიმში მიმდინარეობს, ხოლო საქართველოს მოქალაქეები ახლა შედარებით უსაფრთხო ადგილას არიან, თუმცა აქვთ საკვებისა და წყლის პრობლემა, ელექტროენერგია არ მიეწოდებათ, ამიტომ თითქმის შეუძლებელია მათთან მუდმივ კონტაქტზე ყოფნა.

ადამიანები, რომლებიც „ქრონიკას“ დაუკავშირდნენ, ამბობენ, რომ მათი ახლობლები სამუშაო მიზნით არიან წასულები სუდანში, დაახლოებით ორთვიანი ვიზიტით, ისინი არიან მფრინავები და ორ სხვადასხვა ჯგუფზეა საუბარი. თითოში არის ოცამდე ადამიანი. ანუ ჯამში 40-მდე ადამიანი იმყოფება ამ დროისთვის სუდანში, სადაც მიმდინარეობს სამოქალაქო დაპირისპირება.

„ქრონიკასთან“ საუბარში საქართველოს საგარეო უწყებაში ამბობენ, რომ არიან მუდმივ კონტაქტზე როგორც სუდანში მყოფ საქართველოს მოქალაქეებთან, ასევე მათ ახლობლებთან და ცდილობენ სხვადასხვა გზით, მათ შორის პარტნიორებთან თანამშრომლობით გამოიყვანონ სუდანიდან ეს ადამიანები, თუმცა ვინაიდან ამ ეტაპზე შედარებით რთული ვითარებაა, დღის განმავლობაში ელოდებიან დამატებით სიახლეებს. სუდანში საქართველოს დიპლომატიური მისია არ ჰყავს და ამ ტერიტორიის დაფარვა თურქეთიდან ხდება.

სუდანში გასამხედროებულ დაჯგუფებასა და ქვეყნის არმიას შორის შეტაკებებს ასამდე ადამიანი ემსხვერპლა, დაჭრილია ათასზე მეტი. არმია და გასამხედროებული დაჯგუფება ვერ თანხმდებიან, თუ როგორ უნდა გადავიდეს ქვეყანა სამოქალაქო მმართველობაზე.