თორნიკე რიჟვაძე: ქვეყანას გაუმართლა, რომ ჩვენს პარტიას ხელმძღვანელობს ლიდერი, რომელიც მთელ თავის რესურსს ქვეყნის განვითარებას ახმარს

გულწრფელად გეტყვით, რომ ჩვენს ქვეყანას და მათ შორის ჩვენს გუნდს, გაუმართლა, რომ ჩვენს პარტიას ხელმძღვანელობს ლიდერი, რომელიც მთელ თავის რესურსს ახმარს ჩვენი ქვეყნის განვითარებას და იმ გამოწვევებს, რომლებიც გვაქვს, - ამის შესახებ აჭარის მთავრობის მეთაურმა ბათუმის რესპუბლიკური საავადმყოფოს გახსნისას განაცხადა. მისი თქმით, ბიძინა ივანიშვილის ოჯახის მიერ StopCov ფონდში 100 მილიონის გადარიცხვა მისი საქველმოქმედო მოღვაწეობის ლოგიკური გაგრძელებაა.

„ასევე ეს არის მესიჯი ყველა იმ ჩასაფრებული ოპონენტისთვის, რომლებიც ამ დღეების განმავლობაში თითქოს მორატორიუმის რეჟიმში არ გვაკრიტიკებდნენ, მაგრამ ყოველთვის მაინც ცდილობდნენ, რომ ჩასაფრებული პოზიციიდან ესაუბრათ, როგორც მთავრობის ეფექტურობაზე, განსაკუთრებით კი პარტიის ხელმძღვანელის მოქმედებებზე. ამიტომ, ამ ადამიანებს მოუწევთ შეასრულონ ის სავალდებულო რეკომენდაცია, რომელიც ითვალისწინებს სახლში დარჩენას და ჩასაფრებულ პოზიციაში გაგრძელება პოლიტიკური ცხოვრების“, - განაცხადა რიჟვაძემ.

ბიძინა ივანიშვილმა კორონავირუსთან ბრძოლის ფონდში თანხა 8 აპრილს გადარიცხა.