პირადი ცხოვრების ამსახველი მასალების გავრცელებისა და რესპონდენტის დაშანტაჟების სავარაუდო მცდელობის გამო, „TV პირველის“ წინააღმდეგ, საგამოძიებო უწყებას მიმართავენ

საზოგადოებრივი მოძრაობა „აი ია“ „TV პირველის“ ჟურნალისტის მიერ, რესპონდენტის - გიორგი შარაშიძისა და სხვა პირების პირადი ცხოვრების ამსახველი მასალების შენახვისა და გავრცელების, ასევე, რესპონდენტის დაშანტაჟების სავარაუდო მცდელობის გამო, დღეს საგამოძიებო სტრუქტურებს მიმართავს.

საქმის მასალებს სპეციალურ საგამოძიებო სამსახურს გადასცემენ.

„ნოდარ მელაძის „შაბათმა“, რომელიც ცრუ ინფორმაციის გავრცელებით, ცილისწამებითაა ცნობილი და რომელიც ჩვენი საზოგადოებრივი მოძრაობის დამფუძნებლის, გია გაჩეჩილაძის, იგივე „უცნობის“ შესახებ, მისი და მისი ოჯახის დისკრედიტაციის მიზნით, ასევე, თითიდან გამოწოვილ სიუჟეტს ამზადებდა, კიდევ ერთი ეპიზოდი შემოგვთავაზა. მას შემდეგ, რაც ჟურნალისტმა რესპონდენტისგან - გიორგი შარაშიძისგან, შესაბამისი, სასურველი პასუხები და მოისმინა სიმართლე, ფაქტები და არგუმენტები, მან განზრახ თუ გაუაზრებლად, სისხლის სამართლის დანაშაული ჩაიდინა და რესპონდენტს, რომლისთვისაც მთელი ინტერვიუს განმავლობაში ცდილობდა, მიეთითებინა, რომ მის ხელთ არსებულ გარკვეულ დოკუმენტებში, რომელსაც ის საიდუმლო ფაილებს უწოდებდა, იყო გიორგი შარაშიძისა და საქმის სხვა ფიგურანტი ადამიანების პირადი ცხოვრების ამსახველი მასალები. ინტერვიუს განმავლობაში, ის [ჟურნალისტი] სთხოვდა, ჩაეხედა ამ დოკუმენტებში, ენახა, გაცნობოდა და მხოლოდ მას შემდეგ გაეგრძელებინა ჟურნალისტთან საუბარი. ეს მიუთითებს, რომ ხელშეუხებელი ინფორმაციის ნახვის შემდეგ, ცდილობდა, მისგან სასურველი პასუხები მიეღო, ანუ რესპონდენტი დაეშანტაშებინა, რაც უმძიმესი, უბინძურესი დანაშაულია“, - განაცხადა საზოგადოებრივი ორგანიზაცია „აი იას“ თანადამფუძნებელმა ვატო შაქარიშვილმა დღეს გამართულ პრესკონფერენციაზე.

მისივე თქმით, არსებობს ჟურნალისტისა და გიორგი შარაშიძის მიმოწერის ამსახველი მასალები, რომელიც ადასტურებს, რომ ჟურნალისტი რესპონდენტის დაშანტაჟებას ცდილობდა. ვატო შაქარიშვილი ხაზს უსვამს, რომ საზოგადოებრივი მოძრაობა „აი ია“ ყველა სამართლებრივ გზას მიმართავს, რათა „TV პირველის“ ჟურნალისტის მხრიდან რესპონდენტის შანტაჟის მცდელობა დაუსჯელი არ დარჩეს.

„ჩვენ რამდენიმე დღის განმავლობაში მოვუწოდებდით სამართალდამცველ ორგანოებს, მობრძანებულიყვნენ, დაელუქათ და წაეღოთ ეს მასალები, რადგან ის სიბინძურეს შეიცავს. დღეს ჩვენ ვაპირებთ, თავად წარვადგინოთ ეს ე.წ. დოკუმენტები შესაბამის საგამოძიებო სტრუქტურებში. ეს უმძიმესი დანაშაულია. მინდა, ძალიან მოკლე ვიდეო შემოგთავაზოთ, რომელსაც თან მიმოწერის ე.წ. სქრინები ახლავს, რომელიც ადასტურებს, რომ ჩვენ საერთოდ არ გვექნებოდა ინფორმაცია იმასთან დაკავშირებით, თუ რა არის ამ დოკუმენტების შიგთავსი, რომ არა ჟურნალისტის ისტერიული მიმოწერა რესპონდენტთან - გიორგი შარაშიძესთან, რომელსაც ამ დოკუმენტების დაბრუნებას სთხოვდა. ეს ადასტურებს, რომ მთელი ინტერვიუს განმავლობაში, ის ადამიანის დაშანტაჟებას ცდილობდა“, - განაცხადა ვატო შაქარიშვილმა.