სპორტსმენთა ნაწილი ხურციძისა და მაყაშვილის აშშ-ში დაკავებას ადასტურებს

ქართველ სპორტსმენთა ნაწილი აშშ-ში ავთანდილ ხურციძისა და ლევან მაყაშვილის დაკავების ფაქტს ადასტურებს. ამის შესახებ სააგენტო ipn წერს.

"დაკავებულები ნამდვილად ავთანდილ ხურციძე და ლევან მაყაშვილი არიან, თუმცა ისინი გაუგებრობაში მოყვნენ", - აცხადებენ სპორტსმენები.

ცოტა ხნის წინ გავრცელდა ინფორმაცია აშშ-ში დაკავებული ორი ქართველი სპორტსმენის შესახებ. დაკავებული ავთანდილ ხურციძე WBO-ს ვერსიით მსოფლიოს ჩემპიონი მოკრივეა, ლევან მაყაშვილი კი შერეული ორთაბრძოლების UFC-ს მებრძოლი.

ამერიკის პროკურატურის ინფორმაციის თანახმად, დაკავებული ავთანდილ ხურციძე და ლევან მაყაშვილი ბრუკლინში ცხოვრობდნენ.

ამერიკის პროკურატურის ინფორმაციით, ხურციძესა და მაყაშვილს რეკეტი და თაღლითურ შეთანხმებებში მონაწილეობა ედებათ ბრალად.