აბდალაძე: მემუქრებოდნენ, რომ ჩემ თვალწინ გააუპატიურებდნენ პატიმრებს და მათთან ჩამსვამდნენ

ფოტოგრაფების საქმეზე, დავით დევნოზაშვილის ბრალდების ეპიზოდზე დაზარალებული გიორგი აბდალაძე იკითხება. აბდალაძემ საქმეში მონაწილე ამ დრომდე უცნობი გვარები დაასახელა. ერთ-ერთი ასეთია ვიქტორ ყაჭეიშვილი, რომელიც გლდანის მერვე საპყრობილის ადმინისტრაციის ყოფილი თანამშრომელია. აბდალაძის განცხადებით სწორედ ყაჭეიშვილის მხრიდან იყო მუქარა გაუპატიურების შესახებ. საქალაქო სასამართლოში აბდალაძე 2011 წლის 7 ივლისის მოვლენებს დეტალურად იხსენებს.

"მემუქრებოდნენ, რომ ჩემს თვალწინ გააუპატიურებდნენ პატიმრებს და შემდეგ მათთან საკანში ჩამსვამდნენ", - განაცხადა აბდალაძემ. მისივე თქმით, კონსტიტუციური უსაფრთხოების დეპარტამენტის ყოფილი თანამშრომელი დავით დევნოზაშვილი და გლდანის მერვე დაწესებულების ყოფილი უფროსი ალექსანდრე მუხაძე ფიზიკურ და ფსიქოლოგიურ ზეწოლას ახორციელებდნენ. ემუქრებოდნენ შვილის სიცოცხლით. სასამართლო პროცესს ბრალდებული დავით დევნოზაშვილიც ესწრება.

ფოტოგრაფების საქმეზე უკვე დაკითხეს ზურაბ ქურციკიძე, ირაკლი და ნათია გედენიძეები. შინაგან საქმეთა სამინისტროს კონტრდაზვერვის დეპარტამენტმა 2011 წლის 7 ივლისს ფოტოგრაფები დააკავა, მათ ჯაშუშობაში ადანაშაულებდნენ. დაკავებული იყვნენ ევროპის პრესფოტოს სააგენტოს ფოტოგრაფი ზურაბ ქურციკიძე, ყოფილი პრეზიდენტის პირადი ფოტოგრაფი ირაკლი გედენიძე, მისი მეუღლე, “პრაიმ ტაიმის” ფოტორეპორტიორი ნათია გედენიძე და საგარეო საქმეთა სამინისტროს პრესამსახურის ფოტოგრაფი გია აბდალაძე.

პროკურატურამ ე.წ ფოტოგრაფების საქმე 2016 წელს გახსნა. უწყების განცხადებით ფოტოგრაფები: გიორგი აბდალაძე, ზურაბ ქურციკიძე და ირაკლი გედენიძე ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა.

კონტრდაზვერვის ყოფილი მაღალჩინოსანი დავით დევნოზაშვილი, უფლებამოსილების გადამეტების ბრალდებით დააკავეს. საქმეზე ასევე ბრალდებულია ალექსანდრე მუხაძე, რომელიც იძებნება.