ყანდაურში მომხდარი მკვლელობის საქმეზე დაზარალებულის ოჯახის წევრი მოტივებზე საუბრობს

სოფელ ყანდაურაში მოკლული შავლეგ გამყრელიძის მამა და მარიამ მეზვრიშვილის მეუღლე ფრიდონ გამყრელიძე ფიქრობს, რომ მისი შვილი დანაშაულის მოწმე გახდა და სწორედ ამ მოტივით მოკლეს. საქმე ეხება სავარაუდოდ 85 წლის კაცის მიერ ცოლის, შვილის, რძლისა და ორი მეზობლის მკვლელობას.

"მაქვს საფუძვლიანი ეჭვი, რომ ჩემმა შვილმა დაინახა იქ რაც მოხდა. მოწმე რომ არ დარჩენილიყო, ამიტომ მოიშორეს თავიდან. რაც შეეხება ჩემს მეუღლეს. მან მაშინვე ყვირილი დაიწყო და მეზობლები ხმაურზე შემთხვევის ადგილზე რომ არ მისულიყვნენ, მასაც ესროლეს", - ამბობს ფრიდონ გამყრელიძე.

ფრიდონ გამყრელიძისთვის საეჭვოა ის ფაქტიც, რომ მომხდარის გახმაურების შემდეგ ბრალდებულის მეორე შვილი, ნოდარ გამყრელიძე არ ჩავიდა სოფელში და არ დაესწრო ოჯახის წევრების და ნათესავების დაკრძალვას.

"ბრალდებულ ომარ გამყრელიძის ორი შვილი თბილისში ცხოვრობს. ნოდარ გამყრელიძე, თუ არ ვცდები, აფხაზეთის ომში მონაწილეობდა. აქ იშვიათად ვხედავდი და არ მქონდა მასთან ახლო ურთიერთობა. მკვლელობის დღეს სად იყო, არც ეგ ვიცი. გავიგე პოლიცია ეძებსო. მე ვითხოვ დამნაშავეების სათანადოდ დასჯას", - ამბობს ფრიდონ გამყრელიძე.

არსებული ინფორმაციით, იარაღზე, საიდანაც გასროლა განხორციელდა, ბრალდებულის, ომარ გამყრელიძის დნმ არ აღმოჩნდა, თუმცა ეს ინფორმაცია ოფიციალურად ჯერ არ დასტურდება.

რაც შეეხება ბრალდებულის მეორე შვილს, ნოდარ გამყრელიძეს, პოლიცია ამ დრომდე ეძებს. შვილიშვილი კი იარაღის უკანონო შეძენა-შენახვის ბრალდებით უკვე დააკავეს.

3 მაისს 85 წლის კაცმა სოფელ ყანდაურაში შვილი, რძალი და ორი მეზობელი მოკლა, ცოლი კი დაჭრა, საქმეზე გამოძიება ოჯახური ძალადობის ნიადაგზე დამამძიმებელ გარემოებებში ჩადენილი განზრახ მკვლელობის მუხლით აღიძრა. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

5 მაისს ომარ გამყრელიძეს აღკვეთი ღონისძიების სახით პატიმრობა შეეფარდა.