ბათუმში აგროსასურსათო პროდუქციისა და ტექნოლოგიების მე-14 საერთაშორისო გამოფენა „AGRO BATUMI 2026“ გაიხსნა

გამოფენას აჭარის მთავრობის თავმჯდომარე ზურაბ პატარაძე, აჭარის უმაღლესი საბჭოს თავმჯდომარესთან ცოტნე ანანიძესთან, აჭარის მთავრობის, უმაღლესი საბჭოს და ადგილობრივი თვითმმართველობების წარმომადგენლებთან ერთად დაესწრო.

აჭარის მთავრობის ინფორმაციით, მთავრობის თავმჯდომარემ გამოფენის მონაწილეებს სიტყვით მიმართა და აგროსასურსათო სექტორის განვითარებისთვის მსგავსი ღონისძიებების მნიშვნელობაზე ისაუბრა.

,,AGRO BATUMI რეგიონის მნიშვნელოვანი ბიზნეს პლატფორმაა, რომელიც ადგილობრივი წარმოების გაძლიერებასა და ჩვენი პროდუქციის პოპულარიზაციას უწყობს ხელს. გამოფენა ადგილობრივ მწარმოებლებს შესაძლებლობას აძლევს, პროდუქცია ფართო აუდიტორიას გააცნონ, ერთმანეთს გამოცდილება გაუზიარონ, ახალი საქმიანი კავშირები დაამყარონ და საერთაშორისო ბაზრებზე გასვლის პერსპექტივები გააფართოონ. ჩვენი მიზანია, ხელი შევუწყოთ თანამედროვე ტექნოლოგიების დანერგვას, პროდუქციის ხარისხის გაუმჯობესებასა და აგროსასურსათო სექტორში ახალი შესაძლებლობების შექმნას“, - განაცხადა ზურაბ პატარაძემ.

გამოფენაზე ადგილობრივი და საერთაშორისო კომპანიებია წარმოდგენილი, რომლებიც სოფლის მეურნეობის, სურსათის, სასმელების, ღვინის წარმოების, გადამუშავების, აგრო ტექნოლოგიებისა და აგრობიზნესის სექტორებში საქმიანობენ.

ორი დღის განმავლობაში მონაწილე კომპანიებს შესაძლებლობა ექნებათ, პოტენციურ მყიდველებს საკუთარი პროდუქცია და მომსახურება წარუდგინონ და ინოვაციურ ტექნოლოგიებს გაეცნონ.

ღონისძიებას, რომელიც კომპანია „ჯეონეტ ექსპო“-ს ორგანიზებით და აჭარის სოფლის მეურნეობისა და გარემოს დაცვის სამინისტროს მხარდაჭერით გაიმართა, დიპლომატიური კორპუსის, ბიზნესსფეროს წარმომადგენლები და მოწვეული სტუმრები დაესწრნენ.